O‘zbekiston respublikasi oliy va o`rta maxsus ta’lim vazirligi andijon davlat universiteti

TALAFFUZ 
 
Talaffuz so’z tarkibidagi unli va undosh tovushlarni, matn tarkibidagi so’zlarning to’g’ri 
ohang  bilan  o’qilishini  yuzaga  chiqaradi.  Talaffuz  fonetik  urg’u  olgan  bo’g’inlar,  mantiqiy  urg’u 
olgan  so’zlar  ohangidagi  farqlarni  ko’rsatadi.  Bo’g’in  va  so’zlarning  to’g’ri  talaffuzisiz  badiiy 
o’qish haqida gap bo’lishi mumkin emas. 
Tajribada  shu  narsa  kuzatilganki,  ayrim  maktab  o’quvchilari,  hatto  talabalar  talaffuzida 
nuqsonlar uchraydi. Eng ko’p uchraydigan nuqsonlardan biri «r» tovushini «y» tovushiga monand 
holda  talaffuz  qilishdir.  Masalan:  «bir»  —  «biy»,  «kar»  —  «kay»,  «arra»  —  «ayya»  kabi. 
Shuningdek, «s» «l» tovushi talaffuzida ham nuqsonlar uchraydi. 
Talabalarga,  o’quvchilarga  shuni  uqtirish  zarurki,  talaffuzdagi  tug’ma  nuqsonni  mashq 
orqali  yo’qotish  mumkin.  Jahonga  mashhur  notiq  afinalik  Demosfen  bolaligida  juda  nimjon  va 
kasalmand  bo’ladi.  U  hayotiy  ehtiyoj  tufayli  notiqlik  san'atiga  doir  nazariy  kitoblarni  astoydil 
o’rganadi, talaffuzidagi nuqsonlarni yo’qotish uchun tinimsiz mashq qiladi. Og’ziga tosh solib olib, 
qattiq    va  ravon  gapirishga  harakat  qiladi.  «r»  tovushini  to’g’ri  talaffuz  etish  uchun  kuchuk 
bolasining  irillashini  soatlab  kuzatadi,  o’zi  ham  xuddi  shu  tovushni  qaytaradi.  Oqibat,  ana  shu 
mashqlari tufayli jahonga mashhur notiq bo’lib yetishadi. 
Talaffuzida  «r»  tovushini  ayta  olmaydigan  talaba  har  kuni  tarkibida  «r»  tovushi  bo’lgan 
uchtadan  so’zni  to’g’ri  talaffuz  qilishni  mashq  qilib  borsa,  talaffuzidagi  nuqsonni  yo’qotishi 
mumkin. Masalan, bir kun «arra», «karra» «marra» so’zlari talaffuzini mashq qilishi mumkin.