O‘zbekiston respublikasi axborot texnologiyalari va kommunikatsiyalarni rivojlantirish vazirligi

Mustaqillik – buyuk ne’mat

1991-yil 1-sentabr O‘zbekiston Respublikasining mustaqillik kuni deb e’lon qilindi. Xalqimiz har yili bu kunni bayram sifatida keng nishonlaydi. Mustaqillik sharofati bilan mamlakatimiz siyosiy, iqtisodiy, madaniy va ijtimoiy hayotida chuqur o‘zgarishlar sodir bo‘ldi.

1991-yil 18-noyabrda O‘zbekiston Respublikasi Davlat bayrog‘i tasdiqlandi. Undagi moviy rang mangu osmon va obi-hayot ramzi, oq rang tinchlik ramzi, yashil rang tabiatning yangilanishi, 12 ta yulduz quyosh yilnomamizga aloqador, navqiron yarim oy esa mustaqilligimiz ramzidir.

O‘zbekiston Respublikasining Davlat gerbi 1992-yil 2-iyulda tasdiqlangan. Gerbimiz xalqimizning tinchlik, yaxshilik, baxt-saodat, farovonlik yo‘lidagi orzu-umidlarini ifodalaydi.

Shuningdek, biz o‘z milliy valyutamiz, o‘z madhiyamizga ham ega bo‘ldik. O‘zbek tiliga esa Davlat tili maqomi berildi. Baxtimiz qomusi bo‘lgan O‘zbekiston Respublikasi Konstitutsiyasi 1992-yil 8-dekabrda qabul qilindi.

Mustaqillik davrida «O‘zbekiston Qahramoni», «Sog‘lom avlod uchun», «Mustaqillik», «Do‘stlik», «Amir Temur» ordeni kabi qator unvonlar joriy qilindi.

Hozirgi kunda yurtimizda O‘zbekiston havo yo‘llari Milliy aviakompaniyasi, ko‘plab xorijiy davlatlarning elchixonalari, 59 dan ziyod oliy o‘quv yurtlari mavjud. Vatanimiz rivojlanish va taraqqiyot yo‘lidan shaxdam odimlab bormoqda.
Til

Shirin til – jon ozig‘i, deb bejiz aytishmaydi. Madaniyatli inson muomalada shirinsuxan bo‘ladi, aslo qo‘pollik va dilozorlik qilmaydi. Miltiq o‘qi insonning turli joyiga tegishi mumkin, lekin tildan otilgan o‘qning nishoni bitta, u faqat inson qalbiga tegadi. Shirin va oqil so‘z umr ozig‘i va do‘stlikning mustahkam kalitidir. Qo‘pol va yomon so‘z qahraton qishdagi yoqimsiz izg‘iringa yoki muzxonaga o‘xshaydi, hech kim uning yoniga borib «muzlashni» istamaydi. Zahar til odamlarning asablarini buzadi. Zaharli ilonning zaharli tishini olib tashlay oladigan jarroh topiladi, lekin yoshligidan zahar so‘zlashga o‘rganib qolgan odamning tilini shirin qilish og‘ir va mushkul ish.

Har jihatdan barkamol inson qaysi so‘zni, qayerda va qay xilda gapirishni yaxshi biladi. Zero, xalqimiz «Til – aql tarozisi» deb bejiz aytishmagan, chunki har bir aytilgan so‘z aql-u zakovatdan darak beradi.