O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

1. Hukmning ijrosini kechiktirish. Sudya ozodlikdan mahrum etilgan shaxsga nisbatan hukm ijrosini quyidagi asoslardan birortasi mavjud boʻlganda kechiktirishi mumkin:
1) mahkum jazoni oʻtashiga monelik qiladigan darajada ogʻir kasal boʻlib qolganida, u sogʻayguncha;
2) hukmni ijro etish paytigacha mahkuma homilador boʻlib qolsa, bir yildan oshiq boʻlmagan muddatga;
3) mahkumaning yosh bolasi boʻlsa, u uch yoshga toʻlgunga qadar;
4) jazoni darhol oʻtashni boshlash yongʻin yoki boshqa biror tabiiy ofat yuz berganligi, oilaning mehnatga yaroqli yagona a’zosi ogʻir kasal boʻlib qolganligi, vafot etganligi oqibatida yoki boshqa favqulodda holatlar mahkum yoki uning oilasini juda mushkul ahvolga solib qoʻyishi mumkin boʻlsa, uch oydan oshmagan muddatga.

Hukmning ijrosini kechiktirish – JPKda ko‘zda tutilgan asoslardan biri mavjud bo‘lgan hollarda sudya tomonidan ozodlikdan mahrum etilgan shaxsga nisbatan hukm ijrosini protsessual qonunchilikda belgilangan muddatga ijro etishni to‘xtatib turish.


2. Kasalligi tufayli jazoni oʻtashdan ozod qilish. Surunkali ruhiy kasallikka duchor boʻlgan mahkumni oʻtalmay qolgan jazodan ozod qilishda sudya tomonidan amalga oshirilishi mumkin boʻlgan harakatlarga muvofiq surunkali ruhiy kasallikka duchor boʻlgan mahkumni oʻtalmay qolgan jazodan ozod qilishda sudya unga nisbatan:
– tibbiy yoʻsindagi majburlov chorasini qoʻllashga;
– mahkumni sogʻliqni saqlash organlari yoxud qarindoshlari vasiyligiga berishga haqlidir.
Bunday shaxslar sogʻaygan taqdirda, basharti, bu hol jazoning ijro etish muddati tugashiga qadar sodir boʻlsa, sud tayinlangan jazoni ijro etish toʻgʻrisida ajrim chiqaradi.
Ruhiy kasallikka duchor boʻlgan shaxslardan tashqari, ogʻir kasallikka duchor boʻlgan shaxslarni oʻtalmay qolgan jazodan ozod qilish masalasini hal qilishda sudya sodir etilgan jinoyatning ogʻirligini, mahkumning shaxsini va boshqa holatlarni hisobga oladi.