O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

Qabul qilingan qaror qonuniymi? Ushbu holatda jinoyat ishini bir tergov organidan boshqasiga oʻtkazish qanday hal qilinishi kerak.
XXII BOB. JINOYAT ISHLARINING SUDLOVGA TEGISHLILIGI
(Muallif – yuridik fanlar doktori, professor G.Tulaganova)


Annotatsiya: o‘quvchilar uchun mazkur mavzuning oʻrganilishi jinoyat protsessida sudlovga tegishlilikning mazmun va mohiyati, uning turlari, jinoyat ishlari yurituvidagi ahamiyati va mazkur institutning boshqa jihatlari toʻgʻrisida zaruriy bilim va koʻnikmalarni shakllantirishga xizmat qiladi.

22.1. Sudlovga tegishlilik tushunchasi va uning ahamiyati

Sudlovga tegishlilik – jinoyat-protsessual qonuni tomonidan jinoyat ishini mazmunan u yoki bu sudda koʻrilishini belgilovchi protsessual institut boʻlib, qaysi sud yurituviga qanday ish tegishliligini va yagona sud tizimi sudlari oʻrtasida vakolatlar qanday taqsimlanganligini aniqlaydi.

Sudlovga tegishlilikning jinoyat protsessual qonuni tomonidan ochiq belgilanishi har bir sud tizimiga tegishli boʻlgan ishlarni aniq taqsimlanishiga yordam beradi. Bu esa sudlar oʻrtasida ishlarni koʻrishda sansolarlikka yoʻl qoʻyilmasligi, yuqori sudlarga tegishli ishlarning quyi sudlar tomonidan koʻrilmasligini ta’minlaydi.

Sud tarkibiga koʻra sudlovga tegishlilik borasida soʻz yuritilganida, jinoyat ishlari yakka tartibdagi va hay’at sudloviga tegishlidir. Ijtimoiy xavfi katta boʻlmagan va uncha ogʻir boʻlmagan ishlar yakka sudya tartibdagi sudloviga tegishli hisoblanadi. Birinchi instansiya sudi tomonidan koʻriladigan murakkab jinoyat ishlari sudya va ikki nafar xalq maslahatchisi sudloviga tegishli boʻladi. Oʻzbekiston Respublikasi Oliy Sudi tomonidan koʻriladigan jinoyat ishlari uch nafar sudya sudloviga tegishli boʻlib, ushbu tarkibda jinoyat ishini koʻrib hal qiladi.