O‘zbekistan temir yo‘llari

93. Xabarlovchi signal – lokomotiv (motorvagon poyezdi) ning, o‘ziyurar maxsus harakat tarkibining bitta uzun hushagi, teskari yo‘l bo‘ylab harakatlanganda – bitta uzun, qisqa va uzun hushtagi quyidagi hollarda uzatiladi:
- poyezdning stansiyalarga, yo‘l postlariga, yo‘lovchi to‘xtash punktlariga, tezlik kamaytirishlikni talab qiluvchi olib qo‘yiluvchi qo‘l signallariga, «S» signal belgisiga, yo‘lning egri joylariga, tonnellarga, temir yo‘l o‘tish joylariga, yo‘ldan olinuvchi drezinalar, ta’mirlash moslamalari, yo‘l vagonchalariga va boshqa yo‘ldan olinuvchi harakat birliklariga yaqinlashganida;
- poyezdning ogohlantirishda ko‘rsatilgan ish joylaridan avvalgi kilometrdan boshlab olib qo‘yiluvchi signallar bor-yo‘qligidan qat’iy nazar;
- signalchi uzatayotgan «Tok qabul qilgichni tushir» qo‘l signali qabul qilinganda;
- yo‘lda turgan odamlarga yaqinlashganda va DATK raisi buyruqlarida ko‘rsatilgan boshqa hollarda.
Poyezdning tuman, qor bo‘roni va ko‘rinishni susaytiruvchi boshqa noqulay sharoitlarda harakatlanganida xabarlovchi signal bir necha marta takrorlanadi.
Poyezd qabul qilinishi tufayli manyovrlarni poyezd tuzuvchilar, signalchilar va strelka posti navbatchilari xabarlovchi signal bo‘yicha o‘z uchastkalarida qabul qilinuvchi poyezd harakati xavfsizligi ta’minlanganligini tekshirish va unga ishonch hosil qilishi shart.
94. Hushyorlik signali lokomotiv (motorvagon poyezd), maxsus o‘ziyurar harakat tarkibining bitta qisqa va bitta uzun hushtagi orqali uzatiladi va dam-badam takrorlanadi:
- qizil chiroqli, shartli-ruxsat etuvchi signalli o‘tish svetoforiga yaqinlashganda va keyinchalik blok-uchastka bo‘ylab harakatlanganda;
- oq-oy chiroqli taklif etuvchi signalli kirish svetoforiga yaqinlashganda va poyezdni stansiyaga kirish signalining taqiqlovchi ko‘rsatkichida yoki asosiy chiroqlarining o‘chiq holatida qabul qilinishining boshqa hollarida;
- poyezdni teskari yo‘l bo‘ylab (bu yo‘lda kirish signalining yo‘qligida) qabul qilinishida. Bu signal poyezdning stansiya bo‘g‘izi bo‘ylab harakatlanishi mobaynida ham berilishi kerak.