O'qildi: 16 064 Бир куни ўрмонда фил билан маймун баҳслашиб қолишибди

Фил билан Маймун
15368

O'qildi: 16 064
Бир куни ўрмонда фил билан маймун баҳслашиб қолишибди.
–Мен каттаман. Кучим ҳам кўп. Дарахтларни илдизи билан қўпориб ташлай оламан. Сенинг қўлингдан нима келади?

–Мен сендан кўра чаққонман. Истаган дарахтга чиқа оламан. Дарахтнинг шохига думим билан осилиб ўйнайман. Сен шундай қила оласанми?

Улар ўзларини мақтаб, бир-бирини ерга уриб зерикишибди. Ниҳоят бу масалани ажрим қилиб бериш учун уккининг олдига боришибди.
–Бизнинг фикримиз бир жойдан чиқмаяпти. Қани, холис айт-чи, куч яхшими, эпчилликми? – деб сўрашибди.
Уларнинг мақтанчоқлигини кўрган укки:
–Буни олдин синаб кўриш керак, – дебди. – Мана бу дарёнинг нарёғида бир туп олма дарахти бор. Сизлар бориб шу олмадан менга икки дона олиб келиб беринглар. Мен шунга қараб ажрим қиламан.
Фил билан маймун йўлга тушишибди. Аммо пишқириб оқаётган дарйодан ўтишга маймуннинг юраги бетламабди.

–Ке, устимга миниб ол, – дебди фил ғурур билан. – Мен каттаман кучим ҳам кўп. Бундай сувдан кечиб ўтиш менга ҳеч гап эмас.
Маймун филга миниб дарйодан ўтибди. Улар укки айтган олма тагига келишибди. Бироқ олма дарахти шу қадар катта, баланд ўсган эканки, унинг меваларини пастдан туриб териш мумкин эмас экан. Фил дарахтни илдизи билан суғуриб олмоқчи бўлибди. Аммо кучи етмабди.
–Тўхта, беҳуда уринма, – дебди маймун мақтанчоқлик билан. – Бу иш фақат менинг қўлимдан келади. Мана қараб тур, – дебди маймун пилдираганича дарахт тепасига чиқар экан.
Маймун чиқиб энг яхши пишган олмаларни териб пастга ташлайверибди. Фил уларни илиб олиб бир жойга тўплабди. Улар олмаларни олиб яна илгариги йўл билан дарйодан ўтишибди. Уккининг олдига бориб, олиб келган олмаларни қўйишибди.
–Хўш, куч яхши эканми, эпчилликми? – деб сўрабди укки.
–Албатта куч-қудрат яхши, – дебди фил.
–Ҳаммасидан эпчиллик яхши, – деб яна ўз гапини ма‘қуллабди маймун.
–Фақатгина куч ёки эпчиллик яхши деб бўлмайди, – дебди укки.
–Сизлар бир-бирингизнинг ёрдамингизсиз олмани олиб келолмас эдинглар. Дарйодан филнинг куч-қудрати туфайли ўтдинглар. Олмани маймунниг эпчиллиги билан териб олдинглар. Демак куч билан эпчиллик бирлашгани яхши экан.
Yaqinlaringiz bilan bo'lishing: