Олий ўқув юртларида ўқув жараёнини кредит-модуль тизимида ташкил қилиш

1-боб. Кредит таълим тизими асослари ва Ўзбекистонда олий таълим

тизимини модернизация қилиш

1.1. Асосий тушунчалар

Кредит таълим тизимини жорий этиш янги асосий тушунчаларни ўзлаштиришни талаб қилади. Бунга сўнгги йилларда таълим тизимида янги инглизча атамалар қўлланилаётганлиги, анъанавий атамаларни қўллашдаги қарама-қаршиликлар, такрорланишлар ва алогизмлар асос бўлади.
Ўзбекистон олий таълим муассасаларининг халқаро алоқаларни мақсадли кенгайтириши, мамлакат таълим тизимининг жаҳон тизимига жадал интеграциялашуви оммавий равишда ўқув, услубий, илмий ва ташкилий материалларни инглизчадан таржима қилишни тақозо этмоқда. Бу ерда асосий урғу Ўзбекистонда кредит таълим тизимини жорий этишга ёрдам берадиган, халқаро миқёсда қўлланилаётган қатор муҳим тушунча ва атамаларга қаратилади.
“Educational Program” (таълим дастури) муайян таълим босқичи (бакалавриат, магистратура, докторантура) бўйича мутахассисликни англатса, “Academic Program” (ўқув дастури) ўқув фани нуқтаи-назаридан қўлланилади ва “Syllabus” (силлабус) атамаси билан бир хил маънони англатади. “Course” атамаси ўқув йилини эмас, балки ўқув курсини, фанини, модулини англатади. "Faculty" атамаси факультетни эмас, балки профессор-ўқитувчилар таркибини англатади. Ўқитувчининг лавозимини кўрсатишда “Lecturer” (лектор, маърузачи) ва “Tutor” (тьютор) атамалари кенг қўлланилади. Классификаторда қўлланиладиган “мутахассислик” тушунчасини ифодалаш учун инглиз тилида "Speciality" эмас, балки "Major" атамаси қўлланилади. Ва ниҳоят, ўқув режаси “Academic Plan” эмас, балки “Curriculum” кўринишида қўлланилади.
Шу каби ҳолатларга аниқлик киритиш учун қуйида кредит таълим тизимида муҳим аҳамият касб этувчи асосий тушунчаларга тўхталиб ўтамиз:

• 
  Academic Calendar (академик календарь, ўқув жадвали) – ўқув йили давомидаги ўқув, аттестация ва дам олиш (таътил ва байрам кунлари) кунлари кўрсатилган ўқув жараёни жадвали;
  
• 
  Advisor (эдвайзер) – талабага мутахассислик бўйича ўқув траекториясини танлаш ва ўқув давридаги фанларни ўзлаштириш бўйича ёрдам берувчи кафедра ўқитувчиси.
  
•