Олий таълим ўқув режаларидаги фанларга

4-маъруза(2-соат)
С# дастурлаш тилининг асослари
Режа:

1. 
   С# дастурлаш тилининг ташкил этувчилари, тил алфавити ва лексемаси;
   
2. 
   Идентификаторлар;
   
3. 
   Калит сўзлар;
   
4. 
   Амал белгилари
   
5. 
   Литераллар (константалар)
   
6. 
   Изоҳлар
   

4.1. С# дастурлаш тилининг ташкил этувчилари, тил алфавити ва лексемаси;
Дастурлаш тилини ўрганишни бирор бир хорижий тилни ўрганишга қиёслаш мумкин. Хорижий тилни ўрганиш одатда тилнинг алфавити ўрганишдан бошланади, сўнгра сўзларни, уларнинг таржимасини ўрганишга ўтилади, кейин эса ана шу сўзлардан фойдаланиб жумлалар, гап тузишга ўтилади ва секин асталик билан сўз бойлигини кўпайтириб борган холда хамда кўп машқ қилиш, кўп бора мулоқот қилиш натижасида ушбу тилда ўз фикрларини эркин ифода этишга, тилни мукаммал даражада билишга эришилади. Шунга ўхшаш бирор дастурлаш тилини ўрганишда мана шу кетма-кетликдан фойдаланиш яхши самара беради.
Энди C# дастурлаш тилининг алфавити билан танишсак. C# дастурлаш тилида матнларни ёзишда Unicode кодировкасидаги белгилардан фойдаланилади. Кодировка – бу белгилар ва унга мос келувчи сонли кодлар жадвалидир. Unicode кодировкаси бир вақтнинг ўзида барча алфавитлардаги белгилардан фойдаланиш имконини беради.
C# алфавити қуйидагиларни ўз ичига олади:

• 
  лотин ва миллий алфавитлар ҳамда улар билан биргаликда қўллаш учун остки чизиқ(_);
  
• 
  рақамлар;
  
• 
  махсус белгилар, масалан +, *, { ва & ;
  
• 
  бўш ва табуляция белгилари;
  
• 
  қаторни кўчириш белгилари.
  

Белгилар тўпламидан фойдаланиб, лексемалар ва изоҳларни ёзилади.
Лексема (token) — бу тилнинг дастурлаш тилининг мустақил холда бирор маънони билдирувчи энг кичик бирлигидир. Лексеманинг қуйидаги кўринишлари мавжуд:

• 
  ном ёки исм ( идентификаторлар );
  
• 
  калит сўзлар ;
  
• 
  амал белгилари ;
  
• 
  ажратгичлар ;
  
• 
  литераллар ( константалар ).
  

Лексемага мисол сифатида қуйидагиларни кўрсатишимиз мумкин: Vasia номли идентификатор, goto калит сўзи,+ амал белгиси.
Лексемалардан фойдаланган холда операторлар ва ифодалар ташкил қилинади. Масалан: a+b ифода, у икки катталикни қўшишни билдиради;
int a; - бу a номли ўзгарувчини эълон қилиш операторидир.