Ol neshe kúnlerden berli suwıq bódene suw ástelik penen átiraptaǵı

SAWǴA
Ol neshe kúnlerden berli suwıq bódene suw ástelik penen átiraptaǵı
tikke qırǵaqlardı panalap jawıwın mine usınday baqlap otıratuǵın edi. Bul
batpaqlı jerlerge qubladan kelip, endi onıń úyleriniń diywallarına urılıp
jawıp atırǵan jawın qashan baslanǵanlıǵın ol jaqsı esley almaytuǵın edi.
Keyin suw áste-aqırın kóterile basladı, bir neshe minut toqtap qaldı hám
dárya arqaǵa aǵa basladı. Bara-bara suw hámme salmalardı, japlardı toltırdı, páslik jerlerdi suw bastı. Keshqurın uyıqlap atırǵan paytında suw joldı
da juwıp ketti hám onı sırtqı dúnyadan úzıp qoydı. Aǵım qayıqtı da aǵızıp
ketti, endi hayal dárya tolqını qırǵaqqa taslanǵan taslandıq úyinde jalǵız
ózi qaldı. Suw úydiń fundamentine shekem jetip keldi hám jáne keliwdi
dawam eter edi.
Ol jawın tasqınınan dáryanıń quyılıw jeri teńizge aylanǵanlıǵın,
dáryanıń ózi bolsa onıń qoynında joytılıp ketgenligin kórdi. Qashanlardur
onıń úyi mine usınday tasqınlarǵa shıdamlı qılıp qurılǵan, biraq endi bul
úy júdá gónergen edi. Qalayda tómendegi taxtalardıń bir bólimi shirigen
bolsa kerek. Bálkim, onıń úyin úlken emen teregine baylap turǵan shınjır
da úzilip keter hám ol tap qayıǵına uqsap, aǵıp keter.
Hesh kim járdemge kele almas edi. Ol qansha baqırsa da paydası joq,
sebebi onı hesh kim esitpeydi. Hámme jerde adamlar suwdan nelerdi
qutqarıw múmkin bolsa, qutqaradı; ózleri de qutılıwǵa háreket qılar edi.
Onıń aldınan kimnińdur úyi sonday áste aǵıp ótti, názerinde, tap kómiw
máresiminde qatnasıp atırǵanday túyildi. Jaman kórinse de bul kimniń
úyi ekenligin bilgendey edi. Iyeleri qáwipsiz jerge ótip alǵan bolsa kerek.
Keshirek, jawın hám qarańǵılıq kúsheygende, ol dáryanıń joqarǵı tárepinde
panteranıń ókiriwin esitip qaldı.
Endi úy tap suwıqtan dirildep turǵan tiri janzatqa uqsaytuǵın edi. Ol
krovat janındaǵı stol ústinde turǵan lampanı jerge túsip ketiwden saqlap
qaldı hám onı ayaqları menen qısıp aldı. Úy ǵıshırlaǵan dawıs shıǵarıp
ornınan qozǵaldı hám tap kóbik kibi suw betinde aǵımǵa boysınıp júzip
kete basladı. Ol jataqtıń bir múyeshin uslap aldı. Ana tárepten mına tárepke
shayqalıp úy shınjır imkan bergenshe júzip qırǵaqtan uzaqlastı. Izinen
soqqı keldi, tınıshlıq shókti, aǵashlar tap ińiregendey dawıs shıǵardı. Endi
úy barqulla turatuǵın jerinen ótip áste arqaǵa júze basladı. Onıń demi ishine
SAWǴA
56
túsip ketti, ol biraz waqıt qıymıldamay otırıp qaldı, úy ol jaqtan bul jaqqa
barıp kelip turǵanın sezip otıratuǵın edi. Jawın qatlamınan ótip qaranǵılıq
shókti, ol otırǵan jerinde basın qollarına qoyıp uyıqlap qaldı.
Keshqurın kimnińdur qıshqırıǵınan oyanıp ketti. Dawıs sonshelli
ókinishli edi, ol uyqısı óshpey turıp ayaqqa turdı. Qarańǵıda jataǵına urılıp
ketti. Dawıs dárya tárepten esitiler edi. Ol qandayda bir úlken nárseniń
ayanıshlı jılap jaqınlasıp kiyatirǵanın esiter edi. Bul nárse basqa bir úy
bolıwı múmkin edi. Keyin qanday da bir nárse onıń úyine urılıp ketti hám
úydiń uzınlıǵı boylap sırǵanap ótti. Bul terek edi. Bul nárse onıń aldınan
júzip ótip ketti, endi tek jawınnıń dawısı hám dáryanıń shawqımı esitiler
edi. Oranıp jatıp alıp endi uyıqlayın degende jáne basqa dawıs esitildi. Dawıs
júdá jaqınnan, tap onıń xanasınan, esitilip atırǵanday edi. Ol qarańǵılıqqa
tigilip, krovatdaǵı mıltıqtı tintip taptı. Onı dizesiniń ústine qoydı. Soń “Kim
- bul?” - dep qıshqırdı.
Buǵan juwap retınde jáne baqırǵan dawıs esitildi, biraq bul saparı dawıs
pásirek, sharshaǵan edi. Esik aldında birnárse bolıp, onıń háreketlenip
turǵanın esitip turar edi. Poldıń taxtası ǵıshırlar edi hám nelerdur túsip
atırǵanın sezip turar edi. Keyin kimnińdur tap ishke kirmekshi bolǵanday
diywaldı tırnap atırǵanı qulaǵına esitildi. Endi ol sol kim ekenligin biler
edi. Bul úydiń qasınan aǵıp ótken terekten sekirip ótken úlken pıshıq edi.
Bul pıshıqtı oǵan sawǵa sıpatında aǵım alıp kelgen edi.
Ol tosattan qolı menen qorqıwdan buwılıp atırǵan tamaǵın sıypadı.
Mıltıq onıń dizesinde jatar edi. Ol ómirinde hesh qashan panteranı kórmegen edi. Oǵan olar haqqında bergen hám olardıń qayǵılı ókirgenlerin
uzaqlardan esitken edi. Pıshıq jáne diywaldı tırnar hám esiktiń qasındaǵı
aynanı qaǵar edi. Házirshe ol aynadan pıshıqtı kirgizbey onı diywal artında
uslap tura alsa, ol qáwetersiz boladı. Sırttaǵı pıshıq tat basqan tordı
tırnamay qoydı. Ol hár zamanda ırıldar edi.
Aqırında, jawınlar arasınan jarıqlıq túskende, ol ele jataǵında suwıqqa
tońıp otıratuǵın edi. Onıń eskek esiwge úyrenip qalǵan qolları mıltıqtı
bekkem uslap alǵanınan qaqsar edi. Ol pıshıq oyanıp qalıwınan qorqıp
qıymıldamas edi. Ol krovatta otırıp, úy menen birge tebrener edi.
Jawın bolsa ele jawar, tap ol hesh qashan toqtamaytuǵınday túyiler
edi. Kúlreń qayǵılı tańda aqırı, ılaylanıp ketken suwdı hám shógip ketken
tereklerdiń ushın kórdi. Pıshıq qıymıldamas edi. Bálki, jániwar ketip
qalǵan shıǵar? Ol mıltıqtı shetke alıp qoydı hám krovatdan sayasız túsip
aynanıń aldına keldi. Pıshıq ele sol jerde edi. Ol bosaǵanıń shetinde jatıp
úy baylanǵan emen teregine qarar, tap sol terekke sekirmekshidey edi. Endi
pantera oǵan aldıńǵıday qorqınıshlı kórinbedi. Onıń júnleri jabisıp qalǵan,
ashlıqtan qarnı ishine kirip ketken hám asılıp turar, jatqan jerinde quyrıǵın
bılǵańlatar edi. Házir onı atıp taslaw ushın qolay waqıt. Ol áste mıltıqtı
alıw ushın arqaǵa qarap júre basladı. Sol waqıtta pantera sol tárepke
qarap qaldı. Pıshıq birden sekirip aynanı sındırdı. Ol arqaǵa jıǵılıp, baqırıp
jiberdi. Sonnan soń mıltıqtı qolına alıp aynaǵa qarap attı. Endi ol pıshıqtı
kóre almas edi, biraq oq qáte ketkenin biler edi. Pıshıq qıymılday basladı,
ol aynanıń qasınan ótip baratırǵanında hayal onıń basın hám arqasın kórip
turar edi.
Ol qaltırap kelip jataǵına jattı. Hár tárepten kirip atırǵan suwıq hawa,
dáryanıń hám jawınnıń tınıshlandırıwshı dawısı bir maydan hámme nárseni
umıtıwǵa májbúr qıldı. Ol mıltıqtı tayyar halda uslap, aynanı gúzeter edi.
Azmaz kútip ol ayna aldına bardı.
Pantera ápiwayı úy pıshıqları sıyaqlı basın aldıńǵı pánjelerine qoyıp,
uyıqlap qalǵan edi. Ol jawın baslanǵannan berli birinshi márte ózine,
adamlarǵa, tasqınnan zıyan jetken barlıq nárselerge reyimi keldi hám
jılaǵısı keldi. Ol jataq shetine sırǵanap barıp, ústine tigilgen kórpeni
tasladı. Ol waqıt barında, ele suw qayıǵın ıǵızıp ketiwge úlgermesten aldın,
ol jerden shıǵıp ketiwi kerek edi.
Úy menen birge shayqala turıp ol birden asqazanında kúshli awırıw
sezdi. Bul oǵan kóp waqıttan berli awqat jemegenligin esletti. Ol qansha
waqıt awqat jemegenligin esley almadı. Tap pantera sıyaqlı ol da ash edi. Asxanaǵa ótip, qalıp ketken tórt-bes otınlardan ot jaqtı. Eger tasqın dawam etetuǵın bolsa, ol úydegi stuldı, hátteki stoldı da jaǵıwına tuwrı keledi. Ol ilgekke ilinip turǵan keptirilgen góshti alıp, úlken-úlken bóleklerge kesti hám onı tabaǵa saldı.
Quwırılıp atırǵan góshtiń iyisi onıń basın aylandırdı. Onda ele jáne aqırǵı márte tayarlaǵan sol kúnnen qalǵan azıraq eski pechenye de bar edi, bunnan tısqarı, ol ózine kofe de tayarlap alıwı múmkın, sebebi átırapında suw jeterli. Ol awqat tayarlap atırǵan waqıtta pantera haqqında derlik umıtıp qoyǵan edi. Biraq ol birden muńlı uwildadı. Pıshıq ta ash edi. “Maǵan awqat jep alıwıma imkan ber, - dedi hayal pıshıqqa. - Keyin men sen haqqıńda qayǵıraman”. Hám ol kúlip jiberdi. Ol góshtiń qalǵan bólegin ilgekke asıp atırǵan paytta pantera sonday qattı uwıldap jiberdi, bunnan onıń qolları
qaltırap ketti.
Ol awqatlanıp bolǵan soń, jataǵına otırdı hám mıltıqtı qolına aldı.
Suw úydi sol dárejede bálent kótergen edi, dárya onı tebretkende endi ol
qıyalıqqa tiymes edi. Awqat oǵan biraz bolsa da ıssılıq berdi. Házirshe jaqtılı
bolıp turǵan waqıtta pıshıqtan qutılıp qalıwı múmkin edi. Ol áste aynanıń
aldına eńbeklep bardı. Jániwar elege shekem sol jerde edi. Miyawlap ol
jáne esik aldında júre basladı. Ol hesh qanday qorqıwdı sezbey, biraz waqıt
pıshıqtı tamasha qılıp turdı. Keyin bolsa ne qılıp atırǵanın ańlamaǵan
halda, mıltıqtı bir shetke qoyıp, jataqtı aylanıp ótip, asxanaǵa jol aldı.
Oniń artınan tınıshsızlanǵan pantera qozǵaldı. Ol ilgekte ilinip turǵan
góshtiń qalǵanın aldı hám aynanıń sınıq kózinen sırtqa attı. Aynanıń sırtqı
tárepinen ırıldaǵan dawıs esitildi hám panteranıń albıraǵani endi hayalǵa
ótti. Qılǵan isinen tásirlenip ol krovattıń aldına qaytıp keldi. Ol panteranıń
góshti julıp jep atırǵani esitilip turar edi. Úy shayqalıwın dawam eter edi.
Ol uyqıdan oyanǵanında hámme nárse ózgergenin dárriw payqadı. Jawın
toqtaǵan edi. Úydiń háreketinen endi suw ústinde shayqalmay atırǵanlıǵın
túsindi. Esikti ashıp ol jırtılǵan tor arasınan pútkilley basqa dúnyanı kórdi.
Úy óziniń aldıńǵı ornında, qıyalıqtıń ústinde turar edi. Tómende suw
kóteriler biraq ol endi aldıńǵıday emen teregi menen úydiń arasındaǵı
jerdi qaplamaǵan edi. Pantera ketken edi. Pıshıq bosaǵadan emen teregine
qarap sekirip, jumsaq jerde túsinersiz izler qaldırǵan edi. Bul izler dárhal
óship kete basladı. Bosaǵada kemirip taslanǵan súyekler jatar edi

“Sawǵa” gúrrińiniń mazmunınan paydalanıp tómende berilgen