Нитрат кислота ишлаб чиқариш режа

Нитрат кислота ишлаб чиқариш саноатининг техника-иқтисодий кўрсаткичлари. Нитрат кислота ишлаб чиқариш саноатининг техник-иқтисодий кўрсаткичлари кислотанинг олиниш усули, кислотанинг концентрацияси ҳамда харажат коэффициентлари билан белгиланади.

Суюлтирилган нитрат кислота олишда NО ни босим остида оксидлаш ва сувга юттириш усули иқтисодий жиҳатдан мақсадга мувофиқ келади, чунки бунда:

1. ишқорга юттириш процесси бўлмайди;

   
   

2. юттириш колонналарининг ҳажми атмосфера босими остида ишлайдиган колонналарнинг ҳажмига нисбатан бир неча ўн марта кичик бўлади;

   
   

3. махсус пўлатлар ишлатилмайди, шу сабабли установкаларни қуришга кам маблағ сарфланади;

   
   

4. установкада ишлаш ва ундаги процессларни бошқариш осон. Лекин юқори босим остида ишлайдиган установкаларда катализатор қисман исроф бўлади ва газ босимини ҳосил қилиш учун энергия сарфланади. Шунинг учун ҳозир саноатда комбинациялаштирилган; усул, яъни NО ни NО₂ гача атмосфера босими остида оксидлаб, ҳосил бўлган NО₂ ни НNО₃ га босим остида ўтказиш усули кенг йўлга қўйилмоқда.

   
   

Концентрланган нитрат кислота ишлаб чиқаришда эса тўғридан-тўғри синтез қилиш усули техника-иқтисодий жиҳатдан мақсадга мувофиқдир. Чунки суюқ нитрат кислотани концентрлаш орқали концентрланган нитрат кислота олишда кўп ёқилғи сарф бўлади (айниқса, Н₂SО₄ ни яна қайтадан концентрлаш вақтида), ҳажм жиҳатдан жуда катта бўлган установкалар керак ва шу билан бирга бу установкалар кислоталар таъсири остида жуда тез ишдан чиқади.