Муратов Д., Алимова М., Каримов Ж., Нажмиддинов Ж., Жўраев Ш. Диншунослик ўзбекистон республикаси

МИССИОНЕРЛИК – бир динга эътиқод қилувчи халқлар орасида бошқа бир динни тарғиб қилиш билан боғлиқ на­зарий қарашлар ва амалий хатти–ҳаракатлар мажмуи.
МИТРА (авесто, дўстлик, келишув) – инсон вафотидан сўнг унинг руҳини ҳимоя қилувчи эзгулик язатларидан бири.
МОБАД – диний маросимларни авлоддан авлодга сақлаб қолиш масъулиятини олган, руҳонийлар оиласи, ўрта мақомли руҳоний.
МОБАДАН МОБАД – мобадларнинг мобади, мобад оила­сига мансуб зардушт руҳонийлари табақасининг юқори вакили.
МОБАДЁР – мобадлардан бўлмаган диний маълумотга эга хирбадлардан кейин турувчи мартаба.
МОНАСТЫРЬ – христианликда руҳонийлар жамиятдан ажралиб, фақат ибодат билан шуғулланадиган жой, муас­саса. Аёллар ва эркаклар учун мўлжалланган монастирлар мавжуд.
МОНОФИЗИТЛАР (юнонча, «якка, ягона», «табиат») – руҳоний Евтихий томонидан асос солинган христианлик­даги илк йўналишлардан бири бўлиб, милодий V асрда пайдо бўлган. Исо Масиҳ худо ва инсон табиатида пай­до бўлган бўлса–да, кейинчалик унинг фақат худолик табиати сақланиб қолган деган ғояни олға сурган. Ушбу йўналиш вакиллари 451 йилда Халкидонияда бўлиб ўтган Бутунжаҳон соборида куфрда айбланишган.
МУБОҲ – ислом шариати қилиш ёки қилмасликни киши­лар ихтиёрига қўйган амаллар.
МУҚАДДАС ЁЗУВ, ХУШХАБАР – христианликнинг муқаддас китоби «Инжил»га нисбатан ишлатиладиган номлар.
МУҚАДДАС КИТОБ – «Библия» ва унинг таркибига ки­рувчи китоблар номи.
МУҚАДДАС РИВОЯТЛАР – «Библия» таркибига кир­маган, черков авлиёлари томонидан қабул қилинган ҳужжатлар ва номалар.
МУҚАДДАС РУҲ – христианликда Худонинг уч кўринишидан бири. Муқаддас Руҳ дунёнинг яралишида иштирок этган, Биби Марям ҳам у орқали Исога хомила­дор бўлган.
МУСАННАФ – ҳадис тўпламларининг муайян мавзуларга ажратилган тури.
МУСНАД – 1. Исноди муттасил равишда ўз ниҳоясига етган ҳадис, яъни санади билан ривоят қилинган ҳадис. 2. Санад, иснод сўзларининг синоними. 3. Ҳадис тўпламларининг тури.