Mundarija: 6 – sinf tarix

Baqtriya la`li to`g`risida Ossuriya hujjatlaridagi ma`lumot
"Podshoh so`ragan la'l borasida: "Menga la'l keltiring", degan ekanlar. Men, janobi oliylari, toqqa chiqib, la'lni qo`lga kiritganimda mamlakat ahli menga qarshi qo`zg`alganini bilmaydilar. Podshoh izn bersalar, janobi oliylari, katta qo`shin borib, la'lni keltirishsa; faqat men ular bilan non-u qatiqni baham ko`rmayman; ular yonida yurmayman, sening choparing yonida bo`lmayman, podshoh salomatligi xususida ham so`ramayman. Shohim buni gunohga yo`yinasalar, bas..."
Tarixchi Ktesiy Baqtriyaning Ossuriya bilan aloqalari haqida
Baqtriyaning Ossuriya bilan aloqalari haqida qadimgi yunon tarixchisi Ktesiy (miloddan avvalgi V-IV asrlar) yozib qoldirgan. U uzoq muddat qadimgi fors shohi Artakserks saroyida yashagan. U saroy tabibi bo`lgan. Ktesiy Ossuriya podshosi Ninning Baqtriyaga yurishi haqida hikoya qiladi. Mamlakat aholisining ko`pligi, yirik shaharlari, mustahkam poytaxti Baqtra, Baqtriya podshosi Okslartning xazinasi haqida quyidagicha xabar beradi. "Baqtriya botirlarining ko`pchiligi jasoratini, ularning viloyati ko`plab mustahkam qo`rg`onlarga egaligini yaxshi bilgan Nin o`ziga qarashli elatlardan ko`p sonli jangchilar to`pladi. Yirik kuchlar bilan Baqtriyaga qo`shin tortib, u yerlarga o`tish mushkulligi, daralarning nihoyatda torligidan Nin qo`shinlarini bir necha qismga bo`lgan. Baqtriya yirik shaharlarga ega bo`lganidan tashqari, poytaxti nihoyatda ulkan edi. U Baqtriya deb atalib, bosh shaharlaridan qal`asining va devorlarining mustahkamligi bilan ajralib turardi. Podsho Okslart qurol ko`tarishga qodir barchani safarbar qildi. O`z qo`shinlari tepasida turib, dushmanga ro`baro` bo`ldi va Nin qo`shinlaridan birining daradan o`tishiga imkon yaratdi. Tekislikka yetarli miqdordagi dushman qo`shini o`tib bo`lgach, u o`z qo`shinlaridan jangovar saf tizdi. Dahshatli jang boshlanganda baqtriyaliklar ossuriyaliklarni chekinishga majbur qildilar. Ularni ta'qib etib, tog` etagigacha quvib bordilar va yuz ming nafar dushman qo`shinini qirib tashladilar".