Muhandislik texnologiyasi fakulteti oziq-ovqat mahsulotlari texnologiyasi kafedrasi

MEZ ekstraktsion liniyaning distillyatsiyalash qurilmasi. MEZ ekstraktsiyalash qurimasining distillyatori uch bosqichli sxema bo’yicha ishlaydi (73-rasm). Birinchi ikkita bosqich qurilmalarida dastlabki distillyatsiya, uchinchi bosqichda oxirgi distillyatsiya jarayoni o’tkaziladi. Birinchi bosqich distillyatsiyalash jarayoni ekonomayzer - separator sistemada mistsellani qaynatish orqali amalga oshiriladi. Mistsella shrot bug’latgichlardan chiqayotgan ikkilamchi bug’lar bilan qizdiriladi, jarayon vakuumda intensiv majburiy sirkulyatsiya sharoitida olib boriladi. Ikkinchi bosqich distillyatsiyalash qurilmasi 5 vertikal trubali bug’latgich va 6 separatordan iborat bo’lib, mistsella yopiq bug’ ta’sirida vakuumda qayta ishlanadi. Birinchi va ikkinchi bosqichda bitta kondensator va ejektordan foydalaniladi. Uchinchi bosqichda yuqorikontsentrlangan mistsella tarkibidan erituvchi o’tkir va yopiq bug’ ta’sirida vakuumda bug’latiladi.
Distillyatsiyalash jarayoni 7 vertikal trubali isitgichda (kontsentratorda), so’ngra 8 kolonnali plastinkasimon (oxirgi) distillyatorda olib boriladi. Distillyatsiya jarayoni quyidagi tartibda olib boriladi (73-rasm). Filtrlangan mistsella nasos bilan patrubkadan 3 separatorga kelib tushadi va tsirkulyatsiyalanadigan mistsella bilan aralshtiriladi. Dastlabki mistsellaning kontsentratsiyasi 25...35%, harorati 40...450C teng bo’ladi. Mistsella 12 sirkulyatsion nasos yordamida 1 ekonomayzerga yuboriladi, bu erda tosterdan chiqayotgan bug’ yordamida qizdiriladi va quvur orqali 3 separatorga 4,5 m masofaga ko’tariladi. Ekonomayzer gorizontal to’rtyo’lli trubali issiqlik almashtirish qurilmasi bo’lib, uning isitish yuzasi 363 dona trubkalardan iborat. Trubkalar diametri 19/16 mm teng. Mistsella trubalar ichida, tosterdan chiqayotgan bug’lar trubalar orasida harakatlanadi. Ekonomayzerda (74-rasm) mistsella tosterdan chiqayotgan bug’ yordamida qizdiriladi va qizigan mistsella separatorda benzin bug’laridan ajratilib mistsellaning kontsentratsiyasi 35-45% ga yetkaziladi.