Muhandislik grafikasi

1.12. Tekislikda yotgan to‘g‘ri chiziq va nuqta. Tekislikning bosh chiziqlari

To‘g‘ri chiziqning tekislikka tegishlilik shartlari quyidagicha:

- to‘g‘ri chiziqning ikki nuqtasi tekislikda yotsa;

- to‘g‘ri chiziq tekislikda yotgan ikki kesishuvchi chiziqni kesib o‘tsa;

- tekislikda yotgan ikki kesishuvchi to‘g‘ri chiziqlardan birini kesib o‘tib, ikkinchisiga parallel bo‘lsa, bu to‘g‘ri chiziqlar tekislikka tegishli bo‘ladi.

1.29,a-shaklda berilgan △ABC tekislikning A nuqtasi orqali ixtiyoriy a to‘g‘ri chiziq o‘tkazilgan. Bu to‘g‘ri chiziq BC tomonini 1(1₁,1₂) ­­nuqtada kesib o‘tadi. a to‘g‘ri chiziqqa tegishli bo‘lgan A va 1 nuqtalar △ABC tekislikka tegishli bo‘lganligi uchun a to‘g‘ri chiziq tekislikda yotadi deyiladi.

△ABC tekislikning B nuqtasi orqali AC tomoniga parallel qilib o‘tkazilgan b to‘g‘ri chiziq (1.29,b-shakl) tekislikka tegishli ikki kesishuvchi to‘g‘ri chiziqlardan birini kesib, ikkinchisiga parallel bo‘lganligi uchun △ABC tekislikka tegishlidir.

Agar ixtiyoriy nuqtaning tekislikka tegishliligini isbotlash kerak bo‘lsa, u holda ushbu nuqtaning tekislikda yotgan biror to‘g‘ri chiziqqa tegishliligi aniqlanishi talab etiladi. 1.29,s-shaklda △ABC tekislikda yotgan m to‘g‘ri chiziqdagi D nuqtaning △ABC tekislikka tegishli ekanligi ko‘rinib turibdi.