Mlsning yil gollari

EXTRA TIME
MLSning yil gollari
Kirish so`zi: Vashington, Nyu-York, Los Anjeles, Nyu-Jersi… Sezib turganingizdek “Extra time”da bu safar go`zal diyor bo`lmish Amerika Qo`shma Shtatlariga sayohat qilamiz. So`nggi yillarda butun dunyoning diqqat e`tiborini o`ziga qaratayotgan AQShning futbol bo`yicha chempionati “Major league soccer” yoki qisqacha qilib aytganda MLS o`zining dahshatli o`yinlari va fantastik gollari bilan mashhur. Biz esa bugun MLS da yilning eng yaxshi goli deb topilgan san`at asarlari ichidan 12 tasini hozirlab qo`yganmiz. “Nima uchun 12ta?” deysizmi? Bu savolga barcha gollarni tomosha qilib, o`zingiz javob olasiz. Marhamat!
12. AQSH milliy terma jamoasida 8 yil o`ynagan Brayn Ching o`zining akrobatik ijrosi bilan shoumizning kirish qismini o`ziniki qilmoqda. 88 kg vazn bilan mana shunday ajoyib ijro!
11. Kaliforniyada tavallud topgan Patrik Edvard Jozef Yanni raqib jarima maydonchasi ichida raqsga tushdi o`ziyam. Bu telbanamo san`at namunasini esa qarshi taraf o`yinchilari katta mahorat bilan tomosha qilishdi.
10. Real Solt Leyk jamoasi hujumchisi Rubio Rubin ushbu goli bilan yakunlangan mavsumda MLSning eng chiroyli goli nomini qo`lga kiritdi. Haqiqatdan ajoyib gol!
9. Extra timening 9-o`rinida Uill Jonson. Jonsonning ushbu fantastik goli 2008-yil “Major league soccer” da tengsiz bo`lgan.
8. Mashhur ism va familiyaga ega bo`lgan Marselo Balboaning ushbu goli mashhurlik bobida o`z ismidan sira ham qolishmaydi. Dahshat gol!
7.Braziliyaning San Paulusida tug`ilgan Kamilo Sanvesso Vankuver Uaytkeps klubi uchun o`zining mana bu yulduzli golini kiritgan. Uning ismi yulduzli bo`lmasa-da, ushbu goli bu ta`rifga arziydi, albatta.
6. AQSH milliy termasi safida 25 o`yin o`tkazgan asli liberiyalik Darlington Nagbe 2011-va 2020-yillarda MLSda yil gollarini kiritgan. Uning futbol tarixiga muhrlangan ikkala asari ham festivalimizdan joy oldi. 31 yoshli yarimhimoyachi zarbalarni qiyib qo`yarkan o`ziyam.
5. Kolorado Repidsning shveytsariyalik o`g`loni Shkeljen Gashi o`zining sehrli chap oyog`ida jarima zarbasini qoyilmaqom qilib ijro etgan. Bechora darvozabon shunchalik tashlanmasin bu zarba qarshisida taslim bo`lishga majbur edi.
4. Terminator Zlatan bu safar 4-o`rinda! Uning qalamiga mansub bo`lgan doimiy qo`rqinchli gollar MLSning ssenariysiga mos ekanini payqagan Los Anjeles Geleksi Ibragimovichni Gollivudga chorlagan. Zlatan esa Gollivudni ham tiz cho`ktirdi.
3. Yevropada uncha omadi yurishmay, Los Anjeles Geleksida o`z baxtini topgan Lendon Donovan butun rassomchilik tarixida misli ko`rilmagan asar yaratgan. Uning bu asariga to`g`risi har qanday ta`riflar ham ojizlik qiladi. Keling, siz ham ushbu golni shunchaki tomosha qiling.
2. Buenos Ayresda tug`ilgan Ektor Daniel Tito Villalba pushka zarbalarning oliy namunasi bilan loyihamizda mehmon bo`lmoqda. Bunday mehmonlarni,albatta, qadrlash kerak!
1. Kanadalik Dueyn de Rosaryo “Major league soccer” uchun eng chiroyli sovg`alarni xadya etgan. Uning mana bu ikki jildlik go`zal egizaklarini bir-biridan ajratib bo`lmaydi. Biz esa egizaklarni xafa qilmasdan, ularning ikkisiga ham oliy o`rinni taqdim etdik.

Yakuniy so`z: Marvel kinokompaniyasining super qahramonlarini tanimaydigan insonlar kam bo`lsa kerak. Futbol olamidagi Marveldan sira qolishmaydigan “Major league soccer” bugun “Extra time” uchun o`zining fantastik gollarini taqdim etdi. Inson bitta maqsad sari bor vujudi bilan harakat qilar ekan, albatta, bu besamar ketmaydi. Asarda yozilganidek, “butun koinot u uchun harakatda bo`ladi”. “Extra time” ning eng oliy maqsadi esa futbol galaktikasining bor jozibasini namoyon etish. Bunda bizga futbol galaktikasining barcha nuqtalari tirgak bo`lmoqda. Keyingi safar yashil maydonning yashin nuqtalarida uchrashguncha salomat bo`ling!