Транспорти. Жиззах вилоятида транспортнинг баъзи турлари, яъни темир йўл, автомобил, ҳаво транспорти мавжуд. Аммо асосий транспорт тури автомобил бўлиб, у барча районларни бирбири билан боғлайди. Вилоятда жами автомобил йўллари 36,8 минг км ни ташкил этади. 1427 км йўл давлат, 248 км вилоят, 1330 км йўл хўжалик ва корхоналар тасарруфида. Автомобил йўлларининг қаттиқ қоплама зичлиги 1 кв. км га 0,180 км. Республиканинг бошқа вилоятлари билан алоқа қилишда Катта Ўзбек трактининг аҳамияти катта.
Вилоят ҳудудидан Тошкент-Самарқанд шаҳарларини боғлайдиган темир йўллар (217 км) ўтган. Ушбу транспорт тури мазкур вилоятнинг ижтимоийиқтисодий ривожланишида хизмат қилади.
Бундан ташқари, мамлакат аҳамиятига эга бўлган газ қувурлари, электр узатиш шахобчалари (Сирдарё ИЭСдан) нинг ўтганлиги ҳудуд иқтисодиётини ривожлантиришда алоҳида аҳамият касб этади.
Ҳаво транспортида Жиззах шаҳридан Республиканинг бошқа вилоят марказларига алоқа йўли ўрнатилган. Умумий майдони 18 км2 бўлган Учтепа аэропорти мавжуд.
Шаҳар йўловчи ташиш транспортида аҳолига йўловчиларни белгиланган маршрутларда ташийдиган жамоат транспорти-автобус, троллейбус, енгил автомобил транспорти ҳисобланади.
Автомобил транспорти Жиззах шаҳрини вилоятнинг туман марказлари билан боғлашда ҳамда шаҳар ичида алоҳида ўрин тутади. 1997 йилда Жиззах шаҳрида узунлиги 14 км бўлган троллейбус йўли ишга туширилган.
Вилоятнинг ижтимоийиқтисодий ривожланишида, инфраструктура алоқаларини яхшилашда транспортнинг барча турларини имконият даражасида йўлга қўйиш мақсадга мувофиқдир.
Ташқи иқтисодий алоқалари. Жиззах вилоятининг иқтисодий фаолиятини кенг мажмуада ривожлантириш учун ҳар томонлама қулай, табиий имкониятлар мавжуд. Шу боисдан ҳам Буюк Британия, Германия, Туркия, Хитой, Россия, Украина, Тожикистон каби давлатлар билан алоқалар ўрнатилган.
Ташқи савдо айланмаси 45,0 минг АқШ долларини ташкил этади. Шундан экспорт ҳажми 81,3 фоизга тенг бўлса, қолгани импорт маҳсулотларига тўғри келади. Мустақилликка эришгандан буён вилоятда 30 дан ортиқ қўшма корхоналарга асос солинди. Ташқарига чиқариладиган маҳсулот турларига пахта толаси, кунжара, ўсимлик ёғи, қурилиш материаллари киради.
Ташқи савдо айланмасида «Жибри» (Ўзбекистон–Буюк Британия), «Кумуш тола» (Ўзбекистон-Тожикистон), «Базалт» (Ўзбекистон-Украина) каби қўшма корхоналарнинг ўрнини алоҳида таъкидлаш лозим.
Do'stlaringiz bilan baham: |