Milliy istiqlol g`oyasi asosiy tushuncha va tamoyillar

Milliy istiqlol g’oyasining asosiy tamoyillari - amal qilishi jarayonida o’ziga xos tarzda namoyon bo’ladi. Bunda uning mafkura sifatidagi umumiy va xususiy tamoyillarini ko’rsatish mumkin.
Milliy istiqlol mafkurasining umuman mafkura tushunchasiga xos xususiyatlari, maqsad va vazifalari, amal qilish tamoyillari bo’lishi tabiiy. Bu borada unga ijtimoiy voqealikning in’ikosi ekanligi, jamiyat taraqqiyotining muayyan bosqichiga mos kelish, hayot hodisalarini aks ettirish, amalga oshiriladigan targ’ibot va tashviqot tizimi sifatida namoyon bo’lish kabi umumiy tamoyillar xosdir.
SHu bilan birga, milliy istiqlol mafkurasi O’zbekistonda ozod Vatan, erkin va farovon hayot yaratishga qaratilgan umummilliy hodisa sifatida quyidagi bir qator o’ziga xos amal qilish tamoyillariga ham ega:
1. Mamlakatning mustaqilligini mustahkamlashga xizmat qilish.
2. Davlatimizning hududiy yaxlitligi va sarhadlari daxlsizligini ta’minlashda yordam berish.
3. Qonun ustuvorligini ta’minlash.
4. Demokratiya va o’z-o’zini boshqarishning hayotda mustahkam o’rin egallashiga asoslanish.
5. Milliy va umumbashariy qadriyatlarning uyg’unligiga tayanish.
6. Xalqaro huquq qoidalariga mos kelishi.
7. Iqtisodiy plyuralizm va xilma-xil mulkchilikning erkin shakllanishini ta’minlash.
8. Davlatning bosh islohotchi ekanligi va mamlakatda ijtimoiy barqarorlikning ta’minlanganligiga tayanish.
9. Vijdon erkinligi va fikrlar rang-barangligi muhitini shakllantirish.
10. O’tish davrida aholining ijtimoiy himoyalanganligi, jamiyat hayoti barcha sohalarining erkinlashuvi, islohotlarning tadrijiyligi jarayonlariga xizmat qilishi.
Mazkur tamoyillarning barchasi bir-biri bilan chambarchas aloqada va bog’liqlikda namoyon bo’ladi. Bu o’z navbatida, ularning respublikamizda yashovchi barcha millat va elat vakillarining umumiy manfaatlarini, xalqimizning asrlar mobaynida intilib kelgan orzu-ideallarini, olijanob maqsad-muddaolarini o’zida mujassam ettirishi bilan belgilanadi.
Demak, milliy istiqlol g’oyasining eng muhim va asosiy umumbashariy tamoyillari quyidagilardan iborat:
1. Qonun ustuvorligi.
2. Inson haq-huquqlari va hurfikrlilik.
3. Barcha millat vakillariga hurmat va ular bilan bahamjihat yashash.
4. Diniy bag’rikenglik.
5. Dunyoviy bilimlarga intilish, ma’rifatparvarlik.
6. O’zga xalqlarning ilg’or tajribalari va madaniyatini o’rganish.