Milliy g‘oya ta`limi nazariyasi

Elektron ta’lim resurslari:

1. 
   www. tdpu. Uz
   
2. 
   www. Ziyonet. uz
   
3. 
   www. edu. uz
   
4. 
   www. ma’naviyat. uz
   

10-mavzu: “Milliy g‘oya va ma’naviyatga doir fanlar orqali yoshlarning ijtimoiy-siyosiy faolligini oshirish” mavzusidagi ma’ruza bayoni
Reja:

1. 
   O‘zbekistondagi ta’lim tizimiga o‘ziga xos yondoshuv va milliy g‘oya.
   
2. 
   Mamlakatimizda yuksak intellektual salohiyatli kadrlar tayyorlash siyosatining ustuvor yo‘nalishlari.
   
3. 
   Milliy g‘oya va ma’naviyatga doir fanlar orqali yoshlarda ijtimoiy-siyosiy faollikni tarbiyalash istiqbollari.
   

Birinchi masalaning bayoni: Prezidentimiz Islom Karimov tashabbusi bilan kadrlar tayyorlashni mustahkamlash, ta’lim tizimini tizimini tubdan isloh qilish yo‘llari ishlab chiqildi. 1997 yil 29 avgustda O‘zbekiston Respublikasi Oliy Majlisining 9-sessiyasida O‘zbekiston Respublikasining “Ta’lim to‘g‘risida”gi Qonuni va “Kadrlar tayyorlash Milliy dasturi” qabul qilindi. Uning 1-moddasidayoq “Ushbu Qonun fuqarolarga ta’lim, tarbiya berish, kasb-hunar o‘rgatishning huquqiy asoslarini belgilaydi hamda har kimning bilim olishdan iborat konstitusiyaviy huquqini ta’minlashga qaratilgan”ligi alohida belgilab qo‘yildi.²⁰ Mazkur Qonunga ko‘ra: “Ta’lim O‘zbekiston Respublikasi ijtimoiy taraqqiyoti sohasida ustuvor deb e’lon qilinadi.
Ta’lim sohasidagi davlat siyosatining asosiy prinsiplari quyidagilardan iborat:
ta’lim va tarbiyaning insonparvar, demokratik xarakterda ekanligi;
ta’limning uzluksizligi va izchilligi;
umumiy o‘rta, shuningdek o‘rta maxsus, kasb-hunar ta’limining majburiyligi;
o‘rta maxsus, kasb-hunar ta’limi yo‘nalishini: akademik litseyda yoki kasb-hunar kollejida o‘qishni tanlashning ixtiyoriyligi;
ta’lim tizimining dunyoviy xarakterda ekanligi;
davlat ta’lim standartlari doirasida ta’lim olishning hamma uchun ochiqligi;
ta’lim dasturlarini tanlashga yagona va tabaqalashtirilgan yondashuv;
bilimli bo‘lishni va iste’dodni rag‘batlantirish;ta’lim tizimida davlat va jamoat boshqaruvini uyg‘unlashtirish”.²¹
«Kadrlar tayyorlash milliy dasturi» O‘zbekiston Respublikasining «Ta’lim to‘g‘risida»gi qonunining qoidalariga muvofiq, milliy tajribaning tahlili va ta’lim tizimidagi jahon miqyosidagi yutuqlar asosida tayyorlangan hamda yuksak umumiy va kasb-hunar madaniyatiga, ijodiy va ijtimoiy faollikka, ijtimoiy-siyosiy hayotda mustaqil ravishda mo‘ljalni to‘g‘ri ola bilish mahoratiga ega bo‘lgan, istiqbol vazifalarini ilgari surish va hal etishga qodir kadrlarning yangi avlodini shakllantirishga yo‘naltirilgandir²².
Islohotlarning taqdiri va samarasi birinchi navbatda kadrlarning saviyasiga, ularning zamon va taraqqiyottalablariga nechog‘lik javob berishiga bog‘liq bo‘lganligi uchun ham “Ta’lim to‘g‘risida”gi Qonun va “Kadrlar tayyorlash Milliy dasturi”ning mazmun va mohiyatiga alohida e’tibor qaratildi. Shu boisdan ham mazkur Qonun va Milliy dasturda ta’lim sohasini tubdan isloh qilish, uni o‘tmishdan qolgan mafkuraviy qarashlar va sarqitlardan to‘la xalos etish, rivojlangan demokratik davlatlar darajasida, yuksak ma’naviy va axloqiy talablarga javob beruvchi yuqori malakali kadrlar tayyorlash milliy tizimini yaratish maqsadi ustuvor vazifa qilib belgilab olingan. Xususan, “Kadrlar tayyorlash Milliy dasturi”da ta’lim tizimida “Yuksak umumiy va kasb-hunar madaniyatiga, ijodiy va ijtimoiy faollikka, ijtimoiy-siyosiy hayotda mustaqil ravishda mo‘ljalni to‘g‘ri ola bilish mahoratiga ega bo‘lgan, istiqbol vazifalarni ilgari surish va hal etishga qodir kadrlarning yangi avlodini shakllantirish...”²³ eng ustuvor vazifa bo‘lishi lozimligi alohida ta’kidlab o‘tilgan. Endilikda Kadrlar tayyorlash Milliy dasturi bosqichma bosqich amalga oshirilmoqda. O‘quvchi yoshlar 1-sinfdan 9-sinfga qadar umumiy o‘rta ta’lim maktablarida saboq olib, keyin uch yil davomida o‘z xohish va istaklariga qarab yangidan tashkil etilgan akademik litseylar va kasb-hunar kollejlarida o‘rta maxsus bilim va kasb-hunar ta’limini o‘rganadilar.
Bugungi kunda Toshkent shahrida 118 ta kasb-hunar kolleji hamda akademik litseylar faoliyat yuritayotgan bo‘lib, ularda sal kam yuz ming nafarga yaqin iqtidorli o‘g‘il-qizlarimiz 180 dan ortiq soha mutaxassisliklar bo‘yicha tahsil olmoqdalar. Eng muhimi, yoshlarimizning barkamol ulg‘ayishlari uchun mazkur ta’lim muassasalarida barcha sharoitlar yaratib berilmoqda.
Yangi tashkil etilayotgan akademik litseylar va kasb-hunar kollejlarining jihozlanishi meyoriy hujjatlarga asosan amalga oshirilmoqda.Akademik litsey va kasb-hunar kollejlarida bitiruvchilarni o‘qishdan keyin qaysi oliy o‘quv yurtlariga hujjat topshirishlari yoki qaysi korxona va tashkilotlarga ishga borishlari o‘rganilgan bo‘lib, ularga ma’lumotlar hamda olayotgan mutaxassisliklari bo‘yicha qaysi korxona va tashkilotlarga borib ishlashlari mumkinligi to‘g‘risidagi axborotlar berib borilmoqda. Toshkent shahridagi bitiruvchilarni ish bilan ta’minlash maqsadida, Toshkent shahar Mehnat va aholini ijtimoiy muhofaza qilish bosh boshqarmasi, Ichki ishlar boshqarmasi, «Kamolot» yoshlar ijtimoiy harakati Kengashi, «Mahalla» xayriya jamg‘armasi bo‘limi bilan hamkorlikda qo‘shma dastur tuzilgan. Hozirgi kunda shu dastur asosida kasb-hunar kolleji bitiruvchilarini ishga joylashtirish masalalari asosiy e’tiborda turibdi.
Mamlakatimiz yoshlarining huquq va manfaatlarini himoya qilish, ularni demokratik tamoyillar, milliy va umuminsoniy qadriyatlar asosida ma’nan yetuk va jismonan sog‘lom fuqarolar bo‘lib voyaga yetishlarida ko‘maklashish kabi ezgu maqsadlarini amalga oshirish uchun yoshlarimiz tashabbusi bilan 2001 yilning 25 aprel kuni bo‘lib o‘tgan ta’sis Qurultoyida O‘zbekiston “Kamolot” yoshlar ijtimoiy harakati tuzilgan edi.
Hozirgi kunda 14 yoshdan 30 yoshgacha bo‘lgan yigit-qizlarimizning 5,5 mln. nafardan ortig‘i Harakat safiga ezgu maqsad yo‘lida ixtiyoriy birlashgan. Respublikamizdagi eng yirik nodavlat notijorat tashkiloti hisoblangan “Kamolot” yoshlar ijtimoiy harakati barcha o‘quv muassasalari, harbiy qismlar, huquqni muhofaza etuvchi idoralar, mulkchilik shaklidan qat’iy nazar korxona, tashkilot va muassasalarda tahsil olayotgan, xizmat qilayotgan yoki mehnat faoliyatini olib borayotgan yoshlarning tashabbuslari bilan tashkil etilgan 15 617 ta boshlang‘ich tashkilotlariga ega.
Harakatning 14 ta hududiy, 194 ta mahalliy bo‘lim Kengashlari yoshlar faoliyatiga yaqindan ko‘mak berib keladi. Shu bilan birga Harakat homiyligida “Vatan, do‘stlik va xalqparvarlik uchun” shiori ostida 10 yoshdan 14 yoshgacha bo‘lgan 2,2 mln. nafardan ortiq bolalarni o‘z safiga birlashtirgan “Kamalak” bolalar tashkiloti faoliyat olib bormoqda.
Harakat tomonidan yoshlarni Vatan ravnaqi yo‘lida birlashtirish, barkamol avlodni ma’naviy kamol toptirish, mustaqil fikrlaydigan, o‘zining qat’iy hayotiy e’tiqod va qarashlariga ega bo‘lgan yoshlarni tarbiyalash, ularning huquqiy va siyosiy madaniyatini rivojlantirishga qaratilgan festivallar, forum, konferensiya, ilmiy-amaliy anjuman, ko‘rik-tanlov, davra suhbati, uchrashuv, ijodiy kecha va sport-sog‘lomlashtirish, harbiy vatanparvarlik yo‘nalishidagi ko‘plab ma’naviy-ma’rifiy tadbirlar o‘tkazilmoqda.
Yoshlarning vatanparvarlik tuyg‘usini, huquqiy demokratik jamiyat barpo etish borasidagi tasavvurini yanada mustahkamlash, rivojlantirish, dunyoviy, ilmiy, axloqiy saviyasini oshirishga oid tadbirlarning o‘tkazilishiga barcha akademik litsey va kasb-hunar kollejlarida alohida ahamiyat beriladi. Zero, bugun kamol topayotgan o‘g‘il-qizlarning ma’nan yetuk, axloqan pok ulg‘ayishlari ayni masalaga ham bog‘liq.
Bu tadbirlardan tashqari yoshlarning bo‘sh vaqtlarini unumli va qiziqarli o‘tkazish maqsadida barcha o‘quv yurtlarida fan va kasb-hunar to‘garaklarining faoliyati yo‘lga qo‘yilgan bo‘lib, unda o‘quvchi yoshlar o‘z bilimlarini oshirish bilan birga zarur kasb-hunarga ham ega bo‘lmoqdalar. Bu ishlarning zamirida o‘ziga xos ma’no bor.
Har bir tarbiya, jumladan ma’naviy-axloqiy tarbiya asosini milliy mafkura tashkil etadi. Milliy istiqlol g‘oyalarini o‘quvchi yoshlar ongiga sindirishga qaratilgan o‘quv, ilmiy-uslubiy va tarbiyaviy ishlarning samaradorligini ta’minlash va yanada takomillashtirish maqsadida 2001 yil 18-yanvarda “Milliy istiqlol g‘oyasi: asossiy tushuncha va tamoyillar” fani bo‘yicha ta’lim dasturlarini yaratish va respublika ta’lim tizimiga joriy etish to‘g‘risida Prezidentimiz Farmoyishi e’lon qilindi. Bu milliy istiqlol mafkurasini shakllantirishning nazariy, amaliy va tarbiyaviy ahamiyatini yana bir bor ko‘rsatdi. Zero, ma’naviy yetuk insonlargina barkamol jamiyatni qurishi mumkin.
Xulosa qilib aytganda, O‘zbekiston Respublikasi birinchi Prezidenti akademik I.A.Karimovning “O‘zbekiston: milliy istiqlol, iqtisod, siyosat, mafkura”, “Bizdan ozod va obod vatan qolsin”, “Vatan sajdagoh kabi muqaddasdir”, “Bunyodkorlik yo‘lidan”, “O‘zbekiston XXI asr bo‘sag‘asida: xavfsizlikka tahdid, barqarorlikka tahdid, barqarorlik shartlari va taraqqiyot kafolotlari”, “Yangicha fikrlash va ishlash davr talabi”, “Barkamol avlod orzusi”, “O‘zbekiston XXI asrga intilmoqda”, “Buyuk kelajak sari” nomli asarlari va risolalarida, O‘zbekiston Respublikasi Oliy Majlisining 2001, 2003, 2004 yillarda bo‘lib o‘tgan 2-chaqiriq VI, VII, IX, XI, XIV sessiyalarida so‘zlagan nutqlarida, O‘zbekiston Respublikasining «Ta’lim to‘g‘risida»gi Qonuni va “Kadrlar tayyorlash Milliy dasturi”da O‘zbekistonda ta’lim tizimini, barkamol avlod tarbiyasi bilan bog‘liq yo‘nalishlar faoliyatini tubdan yaxshilashning nazariy- huquqiy asoslari chuqur ilmiy – falsafiy tahlil qilib berilgan.
Kadrlar tayyorlash milliy modelining asosiy tarkibiy qismlari quyidagilardan iboratdir: