«Миллий истиқлол ғояси» фанини ўқитишнинг таълимий ва тарбиявий аҳамияти

7-синфда “Миллий истиқлол ғояси ва маънавият асослари” фани истиқлолнинг миллатимиз келажагини таъминлашдаги аҳамияти, миллий ва умуминсоний қадриятлар, фикр, ғояларнинг турлари, мафкура, тараққиёт, мустақиллик, Конституция, маданият, санъат, инсоний фазилатлар ҳақида билим, амалий кўникма ва малакаларни шакллантиришни назарда тутади.
8-синфда ўқувчилар томонидан эгалланган юқоридаги билим, кўникма ва малакалар янада мукаммалроқ тушунчалар билан бойитилиб, бунда халқимизнинг кучи ва қудрати бирдамликда ва ҳамжиҳатликда эканини ўқувчилар онгига сингдириш назарда тутилади. Стратегик мақсадлар, мафкуравий иммунитет, миллий истиқлол мафкураси, бош ғоя ва асосий ғоялар, инсонийлик, соғлом турмуш турзи сингари тушунчалар ижтимоий ҳаётимиз билан қиёслаш орқали ўрганилади.
9-синфда эса дунёнинг мафкуравий манзараси, геосиёсат, диний экстремизм, терроризм, цивилизация, тараққиётга йўналтирилган ўзбек модели ҳақидаги тушунчаларни ўқувчилар онгига сингдириш орқали уларни мустақилликни қадрлайдиган, бурч ва масъулиятни сезадиган, юрт келажаги учун жавобгарликни намоён қиладиган фазилатларни тарбиялаш асосий вазифа ҳисобланади.
Миллий истиқлол ғоясининг инсон дунёқараши, эътиқоди, тафаккури, характер сифатларини шакллантиришдаги мураккаблиги, тарих, иқтисод, сиёсат, маънавият ва бошқа фанлар ҳақидаги билимлар билан боғлиқлиги фанлараро интеграцияни амалга оширишни, таълим таълим жараёнини ташкил этишга, турли методлардан фойдаланган ҳолда ёндашишни тақозо этади. Бир-бирига яқин бўлган “Ғоя нима?”, “Ғоянинг ўзига хос хусусиятлари ва турлари”, “Мафкура нима?”, “Тараққиёт ва мафкура” масалаларини олиб қарайдиган бўлсак, уларнинг ўзаро алоқадорлиги ва моҳиятидан келиб чиққан ҳолда “Давра суҳбати”, “Эркин минбар”, “Гуруҳлараро баҳс” сингари ўқувчиларни фаолликка ундовчи методлардан фойдаланиш мақсадга мувофиқ бўлади.
Муайян масала юзасидан ўқувчиларнинг қизиқиши, фаоллигини оширадиган, изланувчанликка асосланган “Эвристик мулоқот”, “Алоҳида ҳолатлар таҳлили”, “Муаммоли вазият”, “Ақлий ҳужум” методларидан ижодий фойдаланиш зарур.
“Миллий истиқлол ғояси ва маънавият асослари” фани мазмунининг узвийлик ва узлуксизлик тамойилига риоя этилган ҳолда ўқувчиларда қуйидаги билим, кўникма ва малакаларни шакллантириш кўзда тутилади.