Mikrobiologiya va immunologiya

PR ni qo’yish texnikasi. Reaksiya ikki xil usulda qo’yiladi:
1. Zardob ustiga antigen quyish. Ulengut probirkasiga 0,2-0,3 ml kuydirgi zardobi quyib, ustiga ohista probirka devoridan teng miqdorda ekstrakt (antigen) quyiladi. Bunda komponentlar orasidagi chegara aniq ko’rinishi kerak.
2. Antigen ostiga zardob quyish. Ikkinchi usulda probirkaga avval 0,2-0,3 ml ekstrakt quyib, uning ostiga teng miqdorda Paster pipetkasi bilan kuydirgi zardobi quyiladi. Ikkala usulda ham natija ijobiy bo’lsa, ikkala komponentlar o’rtasida 1-2 daqiqada yaxshi ko’rinadigan tutunsimon rangda halqali pretsipitat hosil bo’ladi
Nazorat reaksiyasi.
1. Standart kuydirgi antigeni + kuydirgi zardobi (natija ijobiy 1-2 daqiqada).
2. Sog’lom hayvon materiali ekstrakti + standart zardob (natija manfiy 1 soatda).
3. Standart antigen + normal zardob (natija manfiy 1 soatda).
4. Fiziologik eritma + standart zardob (natija manfiy 1 soatda).
Natijani baholash. Ijobiy natija (+), gumonli natija (+-), manfiy natija (-).

Diffuzli PR. Buyum oynachasida yoki Petri kosachalaridagi 1 % agar gelida qo’yiladi. Gel qotgach standart shtamp bilan o’yiqlar qilinadi. Markazdagi o’yiqqa standart zardob, atrofidagilarga esa antigen namunalari Paster pipetkasi bilan quyiladi. U eksikatorda bir sutka termostatda turgandan keyin, bir xil antigen va antitelolar uchrashgan joyda kompleks hosil bo’lib, aniq pretsipitat chiziqlari ko’rinadi. Bunda ham nazorat reaksiyasi qo’yiladi. Pretsipitatsiya chiziqlari yanada yaxshi ko’rinishi uchun plastinalar fiziologik eritmada yuviladi va 65%li kadmiy sulfat eritmasi quyiladi, bir necha daqiqadan keyin yanada ravshan ko’rinadi.





Nazorat savollari:
1.Pretsipitatsiya reaksiyasining amaliyotda ishlatilishi va mohiyati.
2.Pretsipitatsiya va agglutinatsiya reaksiyalarida antigenlarning farqi.
3.Halqali pretsipitatsiya reaksiyasini qo’yish texnikasini tushuntiring.
4.Halqali pretsipitatsiya reaksiyasining komponentlarini ayting.
5.Diffuz pretsipitatsiya reaksiyasini qo’yish, uning mohiyati.