Microsoft Word Tursunboyev S. O'zbek teatri tarixi. Majmua

«CHO’LPONNING TASHQI KO’RINISHI» 
 
Muhammadalining  menga  juda  ma’qul  bo’lgan  tomoni  shundaki,  unda  lirizm  bor, 
latofat,  ichki  mayinlik  bor  hamda  shu  jihatlari  bilan  Olim  Xo’jayevga  o’xshab  ketadi. 
Chunki rahmatli Olim Xo’jayevda ham ana shunday ziyolilik bor edi, intelektuallik bor edi, 
aql-u  zakovat  bor  edi.  Muhammadali  ham  Abdulla  Qodiriyga  bag’ishlangan  asarlarda, 
Cho’lpon  haqidagi  spektakllar,  kinofilmlarda  ularning  obrazini  yaratdi.  Cho’lpon  rolida 
aktyorning  tashqi  ko’rinishi,  Cho’lponning  tashqi  ko’rinishiga  juda  o’xshaydi,  yumaloq 
gardishli  ko’zoynak,  kulcha  yuz,  ayniqsa,  shoirning  ko’zlaridagi  nur,  teranlik  aktyorning 
ko’zlarida  ham  bor.  Men  Cho’lponni  ko’rgan  emasman,  ammo  uni  roldagi  qiyofasiga 
solishtiradigan bo’lsak, mana shu xususiyatlar Muhammadalining Cho’lponida ham bor. 
Shu  bilan  birga  Muhammadalining  Cho’lponida  qandaydir  boshqa  xususiyatlar  ham 
bor,  qandaydir  ichi  to’la  isyon,  isyonkor  odam  ruhi  bosiq  bo’lsa  ham,  atrofdagi 
zamzamalarni  bilib  turgan,  sezib  turgan,  shunga  munosabat  bildirishga  qo’rqmaydigan, 
inson uchun, erk uchun eng keskin gaplarni aytishdan cho’chimaydigan odamning qiyofasi 
seziladi. Ham bosiq, mayin, mutafakkir odam, ham shu bilan birga isyonkor, jo’shib turgan, 
qaynab-toshib  turgan  odamning  qiyofasi  namoyon  bo’ladi.  Balki  bir-biriga  qo’shish  qiyin 
bo’lgan  sifatlardir.  Lekin  shu  sifatlar  Muhammadalining  Cho’lponida  juda  mahorat  bilan, 
ustalik, puxtalik bilan bir-biriga chambarchas bog’lab berilgan. 
 
Ozod Sharafiddinov
, O’zbekiston qahramoni. 
«Teatr» jurnali, 2002-yil, 5-son.