Microsoft Word Tursunboyev S. O'zbek teatri tarixi. Majmua

ZUHRA ROLI TA’RIFI 
T. Ja’farova  va  Sh. Rahimova  Zuhra  timsolida  ajib  uyg’unlik  bunyod  etgan  edilar. 
Agar  T. Ja’farova  o’z  qahramonida  dadillik,  jur’atkorlik  alomatlarini  ustuvor  tarzda 
namoyon  etgan  bo’lsa,  Sh. Rahimova  diqqat-e’tiborini  uning  ruhiy  olamiga,  nozik  dil 
og’riqlariga  qaratgan  edi.  Rahimovaning  nozik  ko’ngil  Zuhrasi  Tohir  boshiga  yopirilib 
kelayotgan balo-qazodan larzaga tushgan holatda daryo yoqasiga yaqinlashadi. Yalinish va 
iltijolar  Boboxon  ko’nglini  yumshatolmasligini  u  biladi,  bo’lar-bo’lmasga  qat’iyati 
sinadigan,  g’animlarini  kechiradigan  otalardan  emas.  Holdan  toygan,  najotsiz  Zuhra  — 
Rahimova  otasi  poyiga  o’zini  tashlaydi,  bu  yashashlikdan  nafi  yo’q  bir  qizning  misoli 
so’nggi talpinishi edi. 
«Suv  kelar»,  «Ayirganlar»  ariyalari  Sh. Rahimova  ijrosida  qahramon  dard-alamlarini 
ajib shoirona ifodasiga aylangan edi. 
 
Marfua Hamidova
. «O’zbek musiqali dramasi aktyorlik 
san’ati» (rus tilida). «Fan» nashriyoti, 
1987-yil, 77—78-betlar. 
 
...Tursunxon  Ja’farovaning  eslashicha,  u  Namangan  teatrida  Zuhrani  faqat  malika, 
Boboxonning yolg’iz farzandi, Tohirni jon-dilidan sevgan qiz va bu pok muhabbati yo’lida 
qurbon bo’lgan ma’shuqa sifatida ko’rsatgan edi. Muqimiy nomli teatr rejissori Abduvahob 
Azimov  esa,  spektaklni  faqat  pok  sevgi  fojiasi  emas,  balki  ijtimoiy  tengsizlik  hukmron 
bo’lgan davrdagi kishilar fojiasi sifatida talqin qiladi... Daryo qirg’og’i... Tohirning daryoga 
oqizilishini  eshitgan  xalq  bu  yerga  to’plangan.  G’ala-g’ovur.  Shu  payt  motam  libosidagi 
Zuhra  —  Ja’farova  otasi  Boboxon  oyog’iga  yiqilib,  ko’zida  yosh,  qalbida  alam  bilan  uni 
insofga  chaqiradi.  Yalinib-yolvorib,  xonning  etaklarini  o’pib,  o’ziga  Tohirdan  bo’lak  yor 
munosib  emasligini  uqdirmoqchi  bo’ladi.  Xon  —  A. Boltayevning  keskin  rad  javobi, 
istexzoli  sovuq  kulgisi  Zuhra  —  Ja’farovani  biroz  xushiga  keltiradi...  U  Tohir  tomon 
intiladi...  O’zini  daryoga  tashlamoqchi  bo’lganda  soqchilar  yo’lini  to’sadi.  Shu  onda 
Zuhraning  «Ayirganlar»  radifli  ariyasi  T. Ja’farova  ijrosida  chuqur  dramatizm  bilan 
yangraydi. Ariyaning birinchi qismidagi g’amgin sadolar asta-sekin boshqacha, isyonkorlik 
ohanglari  bilan  almashiladi.  Aktrisa  ariyaning  birinchi  qismida  Zuhraning  cheksiz 
qayg’usini,  iztirobini  ifodalasa,  keyingi  qismida  uning  kuchli  irodasini,  pok  muhabbatini 
himoya qilishga qodir qiz sifatida gavdalantiradi. 
Salomat Abdullayeva. 
«Tursunxon Ja’farova». 
G’afur G’ulom nomidagi Adabiyot va san’at 
nashriyoti, 1974-y, 27—28-betlar. 

---