Microsoft Word kr oydinda yurgan odamlar ziyouz com doc

10 
Ой ўтди. 
Келинникига кўрпа-тўшак матолари билан пахта келди... 
Бу, тўққиз деб аталади. 
11 
Бир оқшом куёвтўра келин акаси бир ёққа сафарлаб кетди, дея эшитди. 
Ошналари билан қайлиқлаб борди. 
Ошналар оҳиста-оҳиста дераза чертди. 
Деразадан янга бўлмиш қаради. 
— Куёв қайлиғи билан кўришсам дейди... — деди ошналари. 
Янга бўлмиш йўл бермади. 
— Кўришгиси келса тўй қилсин, — деди. 

---

Ойдинда юрган одамлар (қисса). Тоғай Мурод 
www.ziyouz.com кутубхонаси 
6
12 
Тўй бозор оқшоми бўлди. 
Тўйга айта-айт бўлди. 
Қизлар келин тарафга айтди, бўзболалар куёв тарафга айтди. 
Қизлар келинникига борди, бўзболалар куёвникига борди. 
Куёвникида неча-неча қўйлар боши кетди. 
Неча-кеча кўзалар бўшаб қолди. 
Созлар, хониш ҳавода ҳаволаниб-ҳаволаниб турди. 
Тўйхона тўла тўйловчи бўлди. 
Кўчада болалар шовқин солди: 
— Тобоқ келди, келинникидан тобоқ келди! 
Дарвозадан елкалари, бошларида дастурхон кўтармиш аёллар пайдо бўлди. Аёллар 
келинникидан ўнта тобоқ олиб келди. 
Тобоқлар бирида палов, бирида қовурма гўшт, бирида қайнатилган тухум, яна бирида 
ширгуруч... бўлди. 
Тобоқлар давраларга қўйилди. 
Тўйловчилар кўнгиллари тортмиш таомдан еди. 
Бўш тобоқлар йиғиб олинди. 
Жўрабоши даврага катта рўмол ёйиб айтди: 
— Куёвтўра келиб қараб турсин, ким қандай совға ташлайди! 
Тўйловчилар атаган совға-саломларини рўмолга ташлади. Биров бир кийимлик атлас ташлади, 
биров шойи ташлади. 
Рўмол деярли тўлди. 
Дуо эзгу бўлди: 
— Тўйники тўйда қайтсин, оллоҳ-у акбар! 
13 
Куёв жўралар келинникига йўл олди. 
Ўзларига ажратилмиш уйга қўнди. 
14 
Келин ҳовли ўнг юзидаги уйда бўлди. 
Қизалоқлар деразама-дераза мўралади, келинни томоша қилди. 
Ичкарида қизлар ғуж бўлди. Бири ҳавас билан, бири ачиниш билан келинга боқди. 
Келин ихтиёри қизларда бўлди. 
Бир қиз бармоқларини тупуклаб-тупуклаб ҳўллади. Қиз келин зулфларини бот-бот буради. 
Зулфлар гажакдан-гажак бўлди. 
Бир қиз тўнтариқлик пиёла кетига ўсма эзди. Қиз келин қошларига ўсма қўйди. 
Келин нигоҳлари кигиз гулида бўлди. 
15 
Шу вақт беш-олти одам келинли уй даҳлизига келди. 
Ички эшик қия очиб қўйилди. 
Хайрулла домла келиндан вакил сўради: 
— Сизким Оймомо Абдибой қизи, ўзингизни Қоплонбой Қурбонбой ўғлига бағишламоқ 
ваколатини акангиз Эсонқул ўғлига топширдингизми? 

---

Ойдинда юрган одамлар (қисса). Тоғай Мурод