Microsoft Word Амиров Elektr o`lchashlar doc

O'zbekistonda elektr o'lchashlar fanining rivojlanishiga hissa qo'shgan
olimlar to'g'risida
Abdullayev Jo'ra Abdullayevich (1927) - O'zbekiston FA akademigi, texnika fanlari doktori, professor. O'zbekistonda xizmat ko'rsatgan fan arbobi. Olimning ilmiy faoliyati ko'p qirrali bo'lib, uning elektr o'lchashlar sohasidagi asosiy ilmiy ishlari boshqarish tizimlarida o'lchash axborotlariga tezkor ishlov berish va axborotlarni uzatish nazariyasi, ko'p bo'g'imli tizimlarda xatoliklarni aniqlash va bartaraf qilishga bag'ishlangan. 9 ta monografiya va o'quv qo'llanmalar, 36 ta ixtiro va 250 dan ortiq ilmiy maqolalar muallifi. Shu jumladan, o'lchash sohasiga oid 2 ta monografiya va o'quv qo'llanma, 11 ta ixtiro va 30 dan ortiq ilmiy maqolalar.
Abdullayev Abdushukur Xamidovich (1959) - texnika fanlari nomzodi, dotsent. Ilmiy ishlari paxta namligini o'lchash va nazorat qiluvchi o'zgartkichlarni takomillashtirishga bag'ishlangan. 4 ta ixtiro, 3 ta darslik va o'quv qo'llanma hamda 100 dan ortiq ilmiy va ilmiy-uslubiy ishlar muallifi.
Abdullayev Muxammadjon Abdusamatovich (1942-2000) - texnika fanlari nomzodi, katta ilmiy xodim. Ilmiy ishlari dissipativ muhit parametrlarini elektr usulda aniq o'lchash masalalariga bag'ishlangan. 8 ta ixtiro va 30 dan ortiq ilmiy maqolalar muallifi.
Azimov Amirilla (1947) - texnika fanlari nomzodi, dotsent. Ilmiy ishlari suv sarfini o'lchashda qo'llaniladigan issiqlik o'zgartkichlarini takomillashtirishga bag'ishlangan. 8 ta ixtiro, 1 ta monografiya va 20 dan ortiq ilmiy ishlar muallifi.
Azimov Raxmat Karimovich (1938) - texnika fanlari doktori, professor. Ilmiy faoliyati issiqlik, elektromagnit va optoelektron birlamchi o'zgartkichlar nazariyasini rivojlantirish va konstruksiyalarini takomillashtirishga bag'ishlangan. 52 ta ixtiro, 7 ta monografiya, 8 ta o'quv qo'llanma va 150 dan ortiq ilmiy va ilmiyuslubiy ishlar muallifi. 1 ta fan doktori va 5 ta fan nomzodi tayyorlagan.
Allaniyazov Xudoybergan (1940) - texnika fanlari nomzodi, dotsent. Ilmiy ishlari suyuqlik va gaz sarfini o'lchovchi o'zgartkichlarning yangi konstruksiyalarini yaratishga bag'ishlangan. 4 ta ixtiro, o'lchashga oid 10 dan ortiq standartlar va 100 ga yaqin ilmiy ishlar muallifi.