1. Meva va sabzavotlarning sifatini baholashda qoʻllaniladigan asosiy koʻrsatkichlar
Meva va sabzavotlarning turlari va navlari juda hilma-xil boʻlishiga qaramasdan sifat
koʻrsatkichlari nomenklaturasini tanlashda uncha koʻp boʻlmagan koʻrsatkichlardan foydalaniladi.
Ularning sifatini baholashda qoʻllaniladigan bu koʻrsatkichlarni umumiy va xususiy koʻrsatkichlari
kabi ikki guruhga jamlash mumkin.
Mahsulot sifatining umumiy koʻrsatkichlari. Umumiy koʻrsatkichlar xoʻl mevalar va
sabzavotlarning sifatini baholashda asosiy koʻrsatkich sifatida qaraladi. Bularga tashqi koʻrinishi,
oʻlchamlari, yoʻl qoʻyiladigan kamchiliklari, hidi va taʻmi kabi koʻrsatkichlar kiradi.
Tashqi koʻrishini bu kompleks koʻrsatkich boʻlib, oʻz rangi, shakli, meva sifatining holati,
butunligi, barraligi kabi ayrim olingan xususiy koʻrsatkichlarni mujassamlashtiradi.
Rangi. Meva va sabzavotlarning isteʻmol qiymati va saqlanuvchanligiga taʻsir koʻrsatadigan
asosiy koʻrsatkichlardan biri ularning rangi hisoblanadi. Meva va sabzavotlarning rangining
intensivligi, ularning tarkibida qanchalik miqdorda rang beruvchi moddalar borligidan va koʻpchilik
hollarda esa pishib yetilganlik darajasidan dalolat beradi.
Standartlarda meva va sabzavotlarning rangi aynan shu turga mos yoki mos emas deb qayd
etiladi. Mahsulotning aniq rangi koʻpchilik hollarda qayd etilmaydi. Baʻzi birlari esa, masalan,
pomidorlar qizil, koʻk, qizil boshli karamlar esa – qizil-binafsha, koʻk-qizil deb qayd etilishi mumkin.
«Rang»ining nominal koʻrsatkichdan chetlanishi meva va sabzavotlarning mexanik
jarohatlanishi, qishloq xoʻjalik zararkunandalari bilan zararlanishi, fiziologik va mikrobiologik
kasalliklari bilan kasallanishi, shuningdek yetarli darajada shakllanmaganligi va pishib yetilmaganligi
natijasida vujudga keladi. Masalan, pishmagan olma, nok, pomidorlar yashil rangda, juda pishgan
olma va pomidorlar esa qizil rangda boʻladi. Danakli mevalar poʻstlogʻining qorayishi, kartoshkaning
koʻkarishi, sitrus mevalar poʻstlogʻida qora dogʻlarning paydo boʻlishi esa, ularning fiziologik
kasalliklar bilan kasallanganligidan dalolat beradi.
Meva va sabzavotlar rangida nominal koʻrsatkichdan chetlanishlar ularda rang beruvchi
moddalarning yaxshi sintez boʻlmaganligi yoki koʻproq darajada sintez boʻlganligidan dalolat beradi.
Boʻyoq moddalarining yaxshi sintez boʻlmaganligi sabzavotlarning isteʻmol qiymatiga salbiy taʻsir
koʻrsatadi, chunki bunday holatda ularning tarkibida ozuqabop moddalarning zahirasi yetarli darajada
toʻplanmaydi.
Shakli. Koʻpchilik hoʻl meva va sabzavotlar uchun ularning shakli ham muhim ahamiyat kasb
etib, qayd etiladigan koʻrsatkichlardan biri sanaladi. Standartlarda urugʻli va koʻpchilik danakli
mevalar shakli boʻyicha aynan shu meva va sabzavot tipiga mos boʻlishi koʻrsatiladi. Ularning shakli
boʻyicha aynan shu tipga mos boʻlmasligi esa, ularning pastki tovar navlariga oʻtkazilishiga asos
boʻladi. Masalan, kechpishar olmalar shaklining aynan shu tipga mos boʻlmasligi va oʻlchamlarining
kichikligi, ularni ikkinchi navga, hatto uchinchi navgacha tushirishga olib keladi.
Baʻzi sabzavotlar uchun (karam, lavlagi, koʻkatlar) standartlarda shakliga talablar keltirilmaydi,
baʻzi sabzavotlar uchun (kartoshka) shakli har xil boʻlishiga yoʻl qoʻyilmaydi, baʻzilar uchun (sabzi,
pomidor, petrushka) esa qoʻngʻir-qiyshiq shakllar boʻlishiga yoʻl qoʻyilmaydi. Piyoz, sarimsoq,
qalampir, baklajan, qovun, tarvuz, oshqovoq singari sabzavotlar esa standart talabi boʻyicha maʻlum
botanic navga mos boʻlishi kerak.
Do'stlaringiz bilan baham: |