Mexanika mashinasozlik fakulteti texnologik mashinalar va jihozlar kafedrasi

Pnevmatik quritkichlar. Donador (lekin qovushib qolmaydigan) va kristall materiallarni eritilmagan holda quritish uchun pnevmatik quritkichlar ishlatiladi. Quritish jarayoni uzunligi 25 m gacha boʼlgan vertikal trubada olib boriladi. Materialning zarrachalari isitilgan havo (yoki tutunli gaz) oqimi bilan birga harakat qiladi. Bunda havo oqimining tezligi qattiq zarrachaning harakat tezligidan katta boʼladi ( 10 ... 30 m/s). Bunday trubasimon quritkichlarda jarayon juda qisqa vaqt (1 .. 3 s) davom etadi, shu sababli material tarkibidagi erkin namlikning bir qismigina ajralib chiqadi.

Pnevmatik quritkichda material bunkerdan taʼminlagich orqali ventilyator yordamida kalorifer orqali vertikal trubaga yuboriladi. Trubada havo material zarrachalarini oʼzi bilan birga olib ketadi. Havo qurigan material bilan birga yigʼuvchi amortizatorga kiradi, keyin siklonga oʼtadi. Siklonda qurigan material havo oqimidan ajraladi, soʼngra toʼkish qurilmasi yordamida tashqariga chiqariladi. Ishlatilgan havo filьtrda tozalangandan soʼng atmosferaga chiqariladi. Shunday qilib, quritish jarayoni pnevmotransport rejimida olib boriladi.

Pnevmatik quritqichlarda energiya sarfi ancha katta, bu sarf material zarrachasining oʼlchami kichrayishi bilan kamayadi, biroq zarrachalarning oʼlchami 8 ... 10 mm dan oshmasligi kerak. Katta oʼlchamli zarrachalari boʼlgan materiallarni quritish hamda materialdan namlikni chiqarish uchun pnevmatik quritkichlarni boshqa tipdagi quritkichlar bilan birga ishlatish zarur. Demak, tuzilishi oddiy va ixcham boʼlishidan qatʼi nazar pnevmatik quritkichlarni ishlatish chegarilangan.