Менингококк инфекцияси

ИНФЕКЦИОН МОНОНУКЛЕОЗ (MONONUCLEOSIS INFECTI),

ФИЛАТОВ КАСАЛЛИГИ

Иситма, генерализацияланган лимфаденопатия, тонзиллит, жигар ва талоқнинг шишуви ва гемограммадаги ўзгаришлар билан кечадиган ўткир юқумли касаллик. Хасталик асосан болаларда ва ўсмирларда учраб туради.

Этиологияси, эпидемиологияси ва патогенези. Касаллик қўзғатувчи Эпштейн — Бар вирусидир. Вирус В лимфоцитларга нисбатан тропизм хусусиятига эга. Инфекция оғиз-бурун орқали юқади ва унча юқумли бўлмайди. Касаллик асосини ретикулогистиоцитар тўқима (лимфа тугунлар, жигар, талоқ), генерализацияланган гиперплазия ташкил этади ва у қондаги ўзгаришлар билан характерланадиган қатор клиник симптомлар билан кечади.

Клиник-гематологик манзараси. Касаллик ўткир бошланади, иситма кўтарилиб, бош оғрийди. Юқори нафас йўлларида катарал ўзгаришлар кузатилади. Периферик лимфа тугунлари (айниқса орқа томонда) озгина катталашган, тўлган сал оғриқ беради. Талоқ ва жигар гиперплазияси кузатилади. Қонда лейкоцитоз (10—30 минг), кўп миқдорда лимфоцитлар, лимфомоноцитлар ва плазматик ҳужайралар қайд этилади. Анемия камдан-кам аниқланади. Тромбоцитлар сони нормал ёки озгина камайган, суяк илиги манзараси ўзгармаган. Лимфоид ва моноцит ҳужайралари оз-моз учрайди.

Ташхиси. Клиник-гематологик маълумотлар ва касалликнинг 12 —14-кунларида қўйиладиган мусбат серологик (титри 1:40, 1:80) реакцияларига асосланади. Шубхали ҳолларда дифференциал ташхис катта ахамиятга эга. Суяк илиги текширилганда ўткир лейкоз касаллигида учрайдиган бластметаплазия аниқланмаслиги шу касалликдан дарак беради. Шу билан бирга ангина, ҳалқум бўшлиғининг локализациялашган дифтерияси, вирусли гепатит (сариқ тури), қизамиқ, шунингдек, бошқа қон касалликлари, генерализацияланган лимфоаденопатия билан дифференциал ташхис қилинади.

Кечиши. Касаллик 3—4 ҳафта давом этади. Хасталик қайталанганда 3—6 ойгача чўзилиб кетиши мумкин. Қондаги ўзгаришлар 1—1,5 йил мобайнида сақланиб туриши мумкин.

Давоси. Симптоматик даво қилинади. Оғир ҳолларда антибиотиклар (тетрациклин, пенициллин) тайинланади. Геморрагик ва гемолитик даво, асоратлари бўлганда гавда массасига 1, 1,5 мг/кг дан преднизолон (қисқа курсларда) буюрилади.