Менежмент. Маркетинг

Rejalashtirish vaqtni qutqaradi

O‘z hayotida muvaffaqiyatga erishganlar ko‘p vaqtlarini rejalashtirishga sarflaydilar. Har kunlik reja tuzish samaradorlikni oshirish va vaqtni unumli boshqarishda zarur. Qoidaga ko‘ra, oldindan to‘g‘ri tuzilgan reja past ko‘rsatkichlarning oldini oladi. Hamma vaqt qog‘ozda o‘ylash va rejalashtirish lozim. Agar maqsad qog‘ozga tushmasa, demak, u mavjud emas. Vazifalar ro‘yxati – o‘ziga xos xarita bo‘lib, u sizning ko‘zlangan maqsad sari yo‘ldan adashib ketishingizga yo‘l qo‘ymaydi. Piter F.Druker o‘zining “Samarali boshqaruvchi” kitobida vazifalarni qog‘ozda aks ettirishga qiziqtiradigan yaxshi bir qiyosni keltiradi: “Qorong‘i joyda bo‘lgan odam vaqt tuyg‘usini tez yo‘qotadi. Ammo hatto tim qorong‘ulikda ham aksariyat kishilar makon tuyg‘usini saqlab qolishadi. YOrug‘, ammo yopiq joyda siz bir necha soatdan keyinoq vaqt harakatini his qilmay boshlaysiz. Va agar siz bunday joyda qancha vaqtdan beri turganingizni hisob-kitob qilmoqchi bo‘lsangiz, o‘z hisobingizdan adashib ketasiz. SHuning uchun biz faqat xotiramizga tayansak, vaqtimiz nimalarga ketayotganini sezmaymiz…”

Reja tushirilgan ro‘yxat bo‘yicha ishlash ilk kundanoq samaradorlikni 25 foizga oshiradi. Oqshomdayoq ertaga qilishingiz kerak bo‘lgan ishlaringiz ro‘yxatini tayyorlab qo‘ying. Ishga keliboq siz har doim kunni nimadan boshlashni bilasiz. Kun davomida tuzilgan ro‘yxat asosida ishlang: yangi ish paydo bo‘lganida uni avvalgi rejalashtirilgan ishlar ro‘yxatiga muhimligiga qarab tirkab qo‘ying. Ro‘yxatingizdagi vazifani bajarganingiz hamono uni albatta o‘chirib qo‘ying. Bu sizga o‘z ishidan qoniqish hissini beradi, g‘ayratlantiradi va quvvat baxsh etadi. Yirik ishlardan tortib eng maydalariga qadar, uzoq muddatlilaru qisqa vaqtlilarigacha, butun umrlikdan boshlab bir kunlikni ham rejalashtirib chiqing. Har bir vazifaga muhlat belgilang. Qiyin, murakkab vazifani mayda, kichik vazifalarga bo‘lib chiqing. Bunda sizga qarorlar daraxti yordam beradi: bunda muhim ish – daraxt, mayda vazifachalar esa uning shoxlaridir. “SHoxlash”ni toki qo‘shimcha kichik vazifalarning barchasi oddiy va ravshan, oson bo‘lmagunicha davom ettiring. Qachondir biror ishga kirishishdan oldin 10/90 qoidasini eslang: ishga kirishishdan oldin uni rejalashtirishga sarflangan 10 foiz vaqt uning yechimiga ketadigan 90 foiz vaqtni tejaydi.