Мен нечун севаман Ўзбекистонни

Мен нечун севаман Ўзбекистонни? Қўшиғи пас овозда фонда янграйди
Экранга ЎзДЖТСУ талабаси Гулмира Каримованинг
“Мен нечун севаман Ўзбекистонни” танлови учун
тайёрлаган видеоролиги ёзуви чиқарилади.

Мен нечун севаман Ўзбекистонни

Сабабини айтгин десалар менга
Шоирона гўзал сўзлардан олдин
Мен таъзим қиламан она халқимга!

Инсон... бу ҳаётга келар экан унга онани ва туғилган Ватанини танлаш имкони берилмайди. Аллоҳ таоло томонидан тақдирида қаерда туғилиш ҳукм қилинган бўлса уша ерда дунёга келади. Киндик қони тўкилган шу азиз тупроқ Ватан демакдир. Ўзга юртлар ҳар қанча гўзал, хашаматли бўлмасин барибир ич ичидан ўзи туғилган жойни қумсайди. Агар буни ўзим мисолимда айтадиган бўлсам оила бу ватан ичра кичик ватандир. мамлакатимизнинг бошқа бир вилоятига саёхатга ёки хизмат сафарига борганимда ҳам барибир Бекободим шамолини, маҳалламизнинг чанг кўчаларини, ундаги беғубор болаларни, ва энг асосийси онам меҳри билан тўлган уйимизни соғинаман. Худди шундай агар чет давлатларга чиқадиган бўлсак ҳам жонажон ва бетакрор ватанимизни соғинамиз. Ўзбекистонимизни қандай бўлса шундайлигича яхши кўраман: шаҳару-қишлоқлари, хатто чўл ва сахроларидаги ҳар бир тупроқ ҳам мен учун азиз. Айнан шу туйғуларни оилага, Ватанга бўлган севгим, юрт соғинчи дея баралла айта оламан.

Мен ҳечам ўзимга мен нечун севаман Ўзбекистонни дея савол бермаганман, агарки бу саволга жавоб қидирадиган бўлсам севгим ортида қандайдир манфаатдорлик излаётгандек туюулади. Мен аксинча айнан Ўзбекистонда туғилганимга, гўзал диёр Ватаним эканлигига шукроналар айтаман. Қалбимда янграган бу шукроналик хисси шоиртабиат бўлганим учунми ўзим ёзган шеъримда ҳам уфуриб туради.
Қалбимни муҳаббат измига қўйиб,
Меҳрингдан куч олиб улғайдим она.
Бетакрор Ватаннинг фарзанди бўлиб,
Бугун забонимда янграр шукрона!

Мунаввар тонгларнинг отишин кўриб,

Кўзларим қувонар севинчга тўлиб,
Ҳур юртда юрганда қаддимни кериб,
Бугун забонимда янграр шукрона!

Тунларни кун этар ҳилол ёғдуси,

Элимнинг қўшиғи бола кулгуси,
Вужудда жўш уриб Ватан туйғуси
Бугун забонимда янграр шукрона.

Тинчликка ярашар тўйу-тантана

Тўй ҳам бир қадрият асрий анъана
Истиқлол иқболин ҳис қилиб мана
Бугун забонимда янграр шукрона!