Медиа ва коммуникация факультети ахборот хизмати ва жамоатчилик билан алоқалар кафедраси

Илмий-маълумотларга сайқал бериш
Курс ишида илмий-маълумотларга сайқал бериш нашр этишга тайёрланаётган илмий ишлар талабларига жавоб бериши керак. Курс ишини ёзиш жараёнида талаба шу соҳада мавжуд бўлган ва ўзи фойдаланган бошқа илмий тадқиқотлардан, маълумотномалардан далил келтириши зарур. Илмий-маълумотларга сайқал бериш давомида талаба қуйидаги шартларга риоя қилиши лозим: курс ишини ёзиш давомида фойдаланилган адабиётлар ва бошқа манбалардан далил келтириш бир хил тартибда ёритилиши керак; матнда фойдаланилган манбалар саҳифа остида изоҳ тарзида аниқ ва тўлиқ келтирилиши, яъни муаллиф ва адабиётнинг номи, нашриёти, йили ва бети келтирилиши керак; саҳифа остидаги изоҳ тарзидаги ёзувда вақтли нашрлар, китоблар, мақолалар номи қўштирноққа олинмайди; саҳифа остидаги изоҳ 1,5 интервал қилиб ёзилиши лозим; саҳифанинг атрофларига безакли чизиқлар қилиниши шарт эмас; курс ишлари ўқув жараёни олиб борилаётган тилда ёзилиши лозим; курс ишлари ёзиш жараёнида фойдаланилган адабиёт ва илмий манбалар ҳажми мавзунинг моҳиятини очиб берадиган мазмунда ва даражада бўлиши зарур; курс ишларини ёзишни қулайлаштириш учун оқ варақларда компьютерда бир ярим оралиқли сатр чизиқлари чизиб олиниши мумкин.
Курс иши ҳимояси тартиби
Талаба 7-10 дақиқа давомида ҳимояда иштирок этаётганларга курс ишининг мақсади, вазифалари, мазмуни ҳамда ўз тавсиялари ва таклифлари тўғрисида ахборот беради. Шундан сўнг талаба курс иши мавзусига ва у билан боғлиқ бўлган ҳимояда иштирок этаётганларнинг саволларига жавоб беради.
Курс иши баҳоси ҳимояда иштирок этаётганлар ва илмий раҳбар томонидан биргаликда талабанинг ёзган иши, тақдимоти ва саволларга жавоблари асосида белгиланади. Курс ишининг белгиланган муддатларда тақдим қилинмаслиги талаба ва магистрнинг ўзлаштира олмаётганлигига асос бўлади. Курс ишининг баҳоси 100 баллик тизимда ёки 2019-2020 ўқув йилида ўқишга қабул қилинган талабаларда 5 баҳолик тизимда баҳоланади ва фанлар баҳоси даражасида аҳамиятга эга ҳисобланади.
Қуйида кўрсатилган ҳолларда курс иши ҳимояга кўйилмайди:
- махсус адабиётлар, дарсликлар, ўқув қўлланмалар, монографиялар, илмий журналлардаги мақолалар ва интернет маълумотларидан фойдаланмасдан, фақат дарсликнинг ўзидан фойдаланиб тайёрланган ишлар;
- дарслик, ўқув қўлланмаси ёки монографиялардан тайёрланган конспект асосида кўчириб тайёрланган, фойдаланилган адабиётлар ёки муаллифлар ишларига иқтибос (ссылка)лар қилинмаган ишлар;
- курс иши мавзусининг мазмуни ёритиб берилмаган ва жуда қўпол хатоларга йўл қўйилган ишлар;
- кўп сондаги грамматик ва стилистик хатолари бўлган, шунингдек, тартибсиз ва нотўғри тайёрланган ишлар.
Бундай ишлар талабаларга камчиликларини тузатиш учун қайтариб берилади. Кўрсатилган муддатда курс ишини кафедрага топширмаган, узрсиз сабабларга кўра курс ишини ҳимоя қилмаган, ҳимояда қониқарсиз баҳо олган талабалар академик қарздор ҳисобланади ва улар курс ишини қайтадан тайёрлайдилар.