Mb: 2021 yil yakunlari bo‘yicha so‘m 3,4 foizga qadrsizlangan

MB: 2021 yil yakunlari bo‘yicha so‘m 3,4 foizga qadrsizlangan


2021 yilda eksportdan tushumlar va transchegaraviy pul o‘tkazmalari mos ravishda 34 foizdan oshgan. So‘m esa 3,4 foizga qadrsizlangan. Bu so‘nggi uch yillikdagi eng past ko‘rsatkich.
Markaziy bank boshqaruvining 2022 yil 20 yanvarda asosiy stavkani yillik 14 foiz darajasida o‘zgarishsiz qoldirish to‘g‘risidagi qarori yuzasidan rasmiy reliz e’lon qilindi.
Qayd etilishicha, 2021 yil yakunlari bo‘yicha inflatsiya ko‘rsatkichlari oraliq maqsadli ko‘rsatkich – target darajasida shakllanib, 10 foizni tashkil etgan.
O‘tgan yil davomida inflyatsion muhitni yuzaga keltirgan asosiy omillar oziq-ovqat va energiya-yoqilg‘i mahsulotlari narxlarining sezilarli darajada o‘sishi bo‘lgan. Narxlarning o‘sishi, bir tomondan, global inflyatsion tendensiyalar, ikkinchi tomondan esa, ichki bozordagi raqobat va takliflarga bog‘liq sabablar bilan izohlangan.
2021 yil yakunlari bo‘yicha so‘m almashuv kursi devalvatsiyasi 3,4 foizni tashkil etib, so‘nggi uch yillikdagi eng past ko‘rsatkichni qayd etgan.

• 
  Devalvatsiya – milliy pul birligi kursining chet el valutalariga nisbatan o‘z qadrini yo‘qotishi.
  

2021 yilda eksportdan tushumlar va transchegaraviy pul o‘tkazmalarining mos ravishda 34 foizdan oshishi, ichki valuta bozorida valuta taklifini qo‘llab-quvvatlovchi omil bo‘lib, bozordagi umumiy taklif hajmini 1,6 barobarga o‘sishiga xizmat qilgan.
«Global inflatsiya davom etayotgani sharoitida tashqi bozorlarda xomashyo va energiya resurslari narxlarining o‘sishi, pandemik vaziyat, jahonda iqtisodiy o‘sishning sekinlashishi bilan bog‘liq xatarlar joriy yil yakuni bo‘yicha inflatsiya darajasining 8-9 foiz doirasida shakllanishi mumkinligini ko‘rsatmoqda.
Shuningdek, 2022 yil yakunlari bo‘yicha yalpi ichki mahsulotning real o‘sishi 5,5-6,5 foiz atrofida bo‘lishi prognoz qilingan. Bunda, o‘tgan 2020-2021 yillarda iqtisodiyotga yo‘naltirilgan fiskal rag‘batlantirishlarning 2022 yilning birinchi yarim yilligida ham iqtisodiy faollikni qo‘llab-quvvatlovchi asosiy omillardan bo‘ladi», deyiladi bayonotda.