Mavzular: Pedagogik mahorat haqida tushuncha, uning oʻqituvchi faoliyatidagi oʻrni va ahamiyati. Pedagogik fikr tarixi va maktab amaliyotida

Tashkiliy-kommunikativ qobiliyatlar quyidagi koʻrinishda namoyon boʻladi:
1) tashkilotchilik qobiliyati – oʻquvchilar jamoasini tashkillay olish va oʻz faoliyatini tashkillay olish;
2) rejalashtirish, nazorat qilish;
3) kommunikativ qobiliyat – oʻquvchilarning yosh va individual xususiyatlarini e’tiborga olgan holda muloqotni toʻgʻri tashkillash;
4) pedagogik kuzatuvchanlik – oʻquvchining koʻrinishidan undagi ichki kechinmalar, kayfiyatini bilib olish, sezgirlik;
5) pedagogik takt – ta’lim oluvchiga pedagogik ta’sir koʻrsatishda aniq vaziyatdan, ta’lim oluvchi shaxsi xususiyatlaridan kelib chiqish va uning nafsoniyatiga tegmaslik;
6) suggestiv qobiliyat – ta’lim oluvchiga emotsional-irodaviy ta’sir oʻtkazish, talab qoʻyish va talabning bajarilishini qat’iy nazorat qilish (bir tomondan qoʻrqitishsiz, qistovsiz – boshqa tomondan boʻshlik qilmasdan);
7) pedagogik prognoz – oʻz harakatlari natijasini, shaxsida boʻlib oʻtadigan oʻzgarishlarni oldindan koʻra bilish;
8) diqqatni toʻgʻri taqsimlay olish – bir paytning oʻzida bir necha faoliyatni olib borish: materialni bayon qilish, oʻz fikrlarini kuzatib borish, berilayotgan savollarga javob berish, ta’lim oluvchilar jamoasi xulqini nazorat qilib turish.
Pedagogik adabiyotlarda oʻqituvchining kasbiy va ijtimoiy moslashuviga ta’sir etuvchi mahsuldor sabablar (omillar) umumlashtirilib pedagogik madaniyat nomi bilan qayd etiladi. Boshqa tushunchalar singari pedagogik madaniyatning ham bir necha xil ta’riflari mavjud. Biroq barcha ta’riflarda pedagogik madaniyat tushunchasi uch ilmiy jihatdan, ya’ni aksiologik, faoliyat va shaxsga yoʻnaltirilganlik nuqtai nazaridan talqin etilishi yaqqol koʻzga tashlanadi.