Mavzu: Yapon sivilizatsiyasining asosiy bosqichlari Asosiy savollar

Davlat miqyosida ajdodlarga sig’inish hukmdor urug’ning ajdodi sanalgan Quyosh ilohasi Amaterasuga e’tiqod qilishda o’z aksini topgan. Ilk sintoizm panteoniga o’sha davrda yapon jamiyatining ijtimoiy tuzilmasida yetakchi o’rin egallagan urug’lar ajdodlari ham kirgan. Ulardan tashqari yaponlar mahalliy ahamiyatga ega turli tabiat ilohalariga sig’inishgan. VI asrda “tenno”imperator hokimiyati rasmiylashtirila boshlangan Yamato davlatida mustaqillikka intiluvchi kuchlar mavjudligiga qaramasdan birmuncha siyosiy barqarorlikka erishilgan. Mafkuraviy tarqoqlikka barham berish uchun Yapon hukmdorlari buddizmga murojaat etganlar. Umumdavlat mafkurasining yaratilishiga qo’shgan hissasidan tashqari buddizm ta’limoti urug’ an’analariga bog’lanmagan va shu tufayli davlat munosabatlari tizimida faoliyat ko’rsatish uchun munosibroq bo’lgan shaxsning yangi tipini shakllantirdi. Buddizmning ijobiy ahloq me’yorlarining kuchayishida ham roli katta.