Mavzu: Tayyorlov guruhda ko`rsatilgan yo`nalish bo`yicha harakat qila olishga, o`z vaziyatini berilgan shart bo`yicha aniqlashga o`rgatishni davom ettirish. Maqsad

Mavzu: Tayyorlov guruhda ko`rsatilgan yo`nalish bo`yicha harakat qila olishga, o`z vaziyatini berilgan shart bo`yicha aniqlashga o`rgatishni davom ettirish.

Maqsad:

• 
  Bolalarning fazoviy tasavvurlarini kengaytirish.
  

Kutilayotgan natijalar:

• 
  Bolalarda o`ng, chap, oldinga, orqaga harakat qilish ko`nikmasi mustahkamlanadi.
  

• 
  Aniq topshiriq va mashqlarda berilgan yo`nalishda harakat qilish ko`nikmasi takomillashadi.
  

• 
  Bolalar shartli belgilar yordamida harakat qilishni o`rganadilar.
  

Kerakli jihozlar:

• 
  Xaritalar (o`lchami bo`yi 12 sm, eni 20 sm).
  
• 
  Buratino (yoki boshqa ertak qahramoni).
  
• 
  Turli shakldagi bayroqchalar.
  

Mashg`ulotning borishi:

Tarbiyachi: Bolajonlar, sizlar ko`rsatilgan yo`nalish bo`yicha harakat qilishni juda yaxshi o`rganib olgansizlar. Bugun men sizlarga juda qiziq topshiriq tayyorlab qo`ydim. Ikkitadan bo`lib mana bu kartalardan birini olasiz. Xonamizdagi narsalar kartalarda ma`lum belgilar bilan belgilab qo`yilgan. Avval belgilar nimalarni bildirishini o`rganib olasizlar. Keyin esa shu belgilar va ularga qo`yilgan sonlar bo`yicha harakat qilasizlar. 1 soni qo`yilgan joyni topasiz va shu joydan boshlab strelka bo`yicha 2 soni qo`yilgan tomonga harakatlanasiz. So`ng 3, 4, 5, 6 sonlari bilan belgilangan joylarga harakatlanib marraga yetib kelasiz.

1-tarbiyachining stoli

2-shkaf

3-bolalar stoli

4-tinchlanish xonasi

5-so`ri

6- marra

Bu xarita bilan ishlash uchun quyidagi savollarga javob berishlaringiz kerak:

1. Xaritada qanday geometrik shakllar tasvirlangan?

2. Xaritada nechta geometrik shakllar chizilgan?

3. Birinchi shakl xonadagi qaysi buyumga o`xshaydi?

4. Ikkinchi shakl xonadagi qaysi buyumga o`xshaydi?

5. 4-shakl xonaning qayerida joylashgan?

6. 3-shakl nimaning shakli?

7. 5-shakl xonaning qayerida joylashgan?

8. 5-shakl nimaning shakli?

Bilimlarni mustahkamlash uchun o`yin: “Bayroqchaga qarab yur”.

Bu o`yin bolalarning xotirasini, diqqatini rivojlantiradi. Bolalarning fazoviy tasavvurlarini mustahkamlaydi.

Tarbiyachi mashg`ulot boshlanishidan oldin xonaning turli joylariga bayroqchalar qo`yib chiqadi. Buratino yoki boshqa ertak qahramoni tarbiyachi yordamida bolalarga topshiriq beradi: “Derazagacha borib, o`ngga 3 qadam yur va uchburchak shaklidagi bayroqchani ol”, bola topshiriqni bajarib bayroqchani topadi. Bolalar bunday topshiriqlarni osongina bajarsalar, topshiriqlar murakkablashtiriladi. Masalan: “5 qadam oldinga yur, chapga o`giril, yana 2 qadam yur, o`ngga buril. U yerda to`rtburchak shaklidagi bayroqchani topasan”. O`yin bir necha marta takrorlanadi.

Bolalar bilimini tekshirish va mustahkamlash uchun savollar:

1. Xarita bilan harakatlanish oson bo`ldimi yoki aytib turilgan topshiriq asosida harakatlanishmi?

2. Xarita asosida marraga yetish uchun nechta joydan o`tdingiz?

3. Chap qo`lingizni balandga ko`taring, o`yin davomida necha marta chapga yurganligingizni eslay olasizmi?

4. O`ng qo`lingizni balandga ko`taring, o`yin davomida necha marta o`ng tomonga yurganligingizni eslay olasizmi?

Mashg`ulot yakunida bolalarni rag`batlantirish.