Мавзу: Ўта хавфли инфекциялар: бруцелёз, сибир яраси лаборатор ташхисоти

Лаборатория ташҳиси. Бактериологик текширув учун беморнинг қони, орқа мия суюқлиги, ҳомила суюқлиги, нажаси ва сийдиги олинади.Қўзғатувчини ажратиб олиш учун сут ва сут маҳсулотлари, агглютининларни топиш учун эса бемор зардоби текширилади.
Бруцеллёз ташҳисини микробиологик усулда аниқлашда дастлаб бемор организмидан бруцеллаларни топишга ҳаракат қилинади. Бунинг учун беморнинг венасидан 5–10 мл қон олинади ва иккита 50–100 мл жигарли бульон қуйилган колбага эқилади. Улардан бири Br. melitensis ажратиб олиш учун оддий аэроб шароитда, иккинчиси Br. abortus эса 10% СО₂ бўлган шароитда, термостатда ўстирилади. Бруцелланинг биринчи генерацияси жуда секин ўсганлиги учун экмани термостатда бир ой сақланади.
Аммо соф культурани олиш ва идентификация қилиш учун ҳар 4–5 кунда қиялантирилган агарга эқилади. Бунда бруцеллалар рангсиз, товланувчи, ялтироқ S- шаклидаги колониялар ҳосил қилади. Олинган культураларни идентификация қилиш учун махсус агглютинация берувчи зардоб билан буюм ойначасида агглютинация реакцияси қўйилади ва махсус фагга нисбатан сезгирлиги аниқланади. Бруцеллалар барча турларининг қандларни парчалаш фаолияти паст даражада. Уларни Н₂S ҳосил қилиши, СО₂ ва анилин суюқликлар таъсирига сезувчанлигига кўра дифференциация қилинади.
Касалликнинг 10–12-кунидан бошлаб бемор қонида кўп миқдорда агглютининлар тўпланади. Уларни аниқлаш учун кенгайтирилган агглютинация (Райт) реакцияси қўйилади. Унинг диагностик титри 1:200. Кўпчиликни тезда текшириш учун шиша ойначада бемор қони ва бруцелла диагностикуми билан Хеддельсон реакцияси қўйилади.