|
Tinglovchilarga oliy ta’lim tizimida 2019 yilda amalga oshirilgan islohotlar tahliliy tushuntiriladi:
2019 yil barcha sohalar singari mamlakatimiz oliy ta’lim tizimi uchun ham shiddatli va yangiliklarga boy bo‘ldi: yangi OTMlar, yangi yo‘nalishlar ochildi, tizim rivoji uchun bir qator qonun va qarorlar qabul qilindi.
O‘zbekiston Respublikasi Prezidentining 2019-yil 7-yanvardagi qaroriga binoan Toshkent shahrida Amiti universiteti tashkil etildi. Universitetda axborot-kommunikatsiyasi texnologiyalari sohasida, birinchi navbatda, dasturiy ta’minotini ishlab chiqish, axborot tizimlari va kompyuter tarmoqlarini boshqarish bo‘yicha xalqaro standartlar darajasida yuqori malakali mutaxassislar tayyorlanadi.
O‘zbekiston Respublikasi Prezidentining 2019-yil 17-yanvardagi qaroriga asosan, Muhammad al-Xorazmiy nomidagi Toshkent axborot texnologiyalari universitetining maxsus fakulteti Mudofaa vazirligi Axborot-kommunikatsiya texnologiyalari va aloqa harbiy instituti etib qayta tashkil qilindi.
O‘zbekiston jurnalistika va ommaviy kommunikatsiyalar universitetida harbiy jurnalistika qayta tayyorlash kursi va harbiy jurnalistika fakulteti ochildi.
Andijon viloyatida O‘zbekiston Respublikasi Prezidentining tegishli qaroriga binoan Sharda universiteti tashkil etildi. Unda o‘quv jarayonlari Hindistoning Sharda universiteti o‘quv dasturlari asosida O‘zbekiston Respublikasi Davlat ta’lim standartlari talablarini inobatga olgan holda ishlab chiqarilgan o‘quv rejalari va dasturlari bo‘yicha olib borilmoqda.
Parij xalqaro moda akademiyasi va Toshkent to‘qimachilik va yengil sanoat institutining qo‘shma fakulteti ochildi. Ushbu o‘quv yili qabulidan boshlab abiturientlarga oliy ta’lim muassasalarining test sinovi topshiriladigan fanlar majmuasi bir xil bo‘lgan uchtagacha bakalavriat ta’lim yo‘nalishida tanlovda ishtirok etish huquqi berildi. 2019 yildan DTM ruxsatnomalarini bevosita Davlat test markazi saytidan yuklab olish imkoniyati yaratildi.
To‘raqo‘rg‘on tumanidagi Is’hoqxon Ibrat nomidagi xorijiy tillarga ixtisoslashgan maktab-internatini a’lo baholarga bitirgan bitiruvchilar bakalavriatning xorijiy til va adabiyot, filologiya va tillarni o‘qitish yo‘nalishlariga qo‘shimcha davlat grantlari asosida imtihonsiz o‘qishga qabul qilinuvchilar qatoriga kirdi.
Ural davlat tibbiyot universiteti bilan hamkorlik shartnomasiga muvofiq, Namangan davlat universitetida to‘rtta, ya’ni: davolash ishi, pediatriya ishi, stomatologiya va farmatsevtika yo‘nalishlari bo‘yicha yangi fakultet tashkil etildi.
Buxoro muhandislik texnologiya, Jizzax politexnika va Farg‘ona politexnika institutlarida O‘zbekiston Respublikasi Prezidentining 2019-yil 23-maydagi “Qurilish materiallari sanoatini jadal rivojlantirishga oid qo‘shimcha chora-tadbirlar to‘g‘risida” gi qaroriga binoan qurilish materiallari sanoati sohasidagi kadrlar tayyorlash yo‘lga qo‘yildi.
Toshkent irrigatsiya va qishloq xo‘jaligini mexanizatsiyalash muhandislari institutining Qarshi filiali faoliyati yo‘lga qo‘yildi.
Ajiniyoz nomidagi Nukus davlat pedagogika institutining Ellikqal’a pedagogika fakulteti tashkil etildi.
Markaziy Osiyoda birinchi bor Toshkentdagi Turin politexnika universitetining 2 kursiga hech qanday imtihonlarsiz qabul qilish imkoniyati paydo bo‘ldi. OTM rektorlariga xorijlik fuqarolar uchun to‘lov-shartnoma qiymatini belgilash huquqi berildi. Toshkent davlat iqtisodiyot universitetining Samarqand filiali tashkil etildi.
TATU tarkibida O‘zbek-Belarus qo‘shma axborot texnologiyalari fakulteti tashkil etish chora-tadbirlari to‘g‘risidagi Hukumat qarori qabul qilindi. Fakultetning asosiy vazifasi respublika iqisodiyotining real sektori tarmoqlari uchun axborot texnologiyalarini dasturiy ta’minlash, mobil tizimlarini dasturlash, sun’iy intellekt sohalari bo‘yicha malakali mutaxassislarni tayyorlash hisoblanadi.
O‘zbekiston Respublikasi Prezidentining 2019-yil 4-iyundagi qaroriga binoan Toshkent shahrida “Moskva energetika instituti“ milliy tadqiqot universiteti federal davlat budjeti oliy ta’lim muassasasining (Rossiya Federatsiyasi) filiali tashkil etildi.
MGIMOning Toshkent shahrida filiali tashkil etildi. Unda biznes, informatika, xalqaroYu xususiy, fuqarolik huquqi va arbitraj, xalqaro savdo va moliya huquqi kabi yo‘nalishlarda bakalavr hamda magistirlar tayyorlanadi.
Toshkent tibbiyot akademiyasi Farg‘ona filiali Rossiya Federatsiyasinig Kuban davlat tibbiyot universiteti bilan “Davolash ishi” yo‘nalishida “Double degree” (3+3) qo‘shma dasturlari asosida xalqaro fakultet ochish bo‘yicha shartnoma imzolandi.Toshkent shahrida Adju universiteti (Koreya Respublikasi) ochildi.
2019-2020 o‘quv yilida O‘zbekiston Respublikasi fuqaro muhofazasi instituti magistiraturasiga qabul to‘g‘risida Hukumat qarori qabul qilindi.
Buxoroda Fransiyaning VATEL mehmonxona va turizm biznesi instituti 2019 o‘quv yildan yoshlarni talabalikka qabul qildi. “Marko Polo” o‘quv dasturi asosida ta’lim beriladigan mazkur institutda talabalar 2-bosqich davrida VATELning 59 ta shunga o‘xshash maktablaridan birida bir yil tahsil olish imkoniga ega bo‘ladi. O‘zbekiston Respublikasi Prezidentining 2019-yil 11-iyundagi “Oliy va o‘rta maxsus ta’lim sohasida boshqaruvini isloh qilish chora tadbirlari to‘g‘risida” gi farmoniga muvofiq Oliy va o‘rta maxsus ta’lim vazirligining Kasb-hunar ta’limi markazi tugatildi.
Do'stlaringiz bilan baham: | 
