Mavzu: mulohaza. Hulosa chiqarish. Reja: Mulohaza tafakkur shakli va xulosa chiqarishning tarkibiy qismi sifatida

b) INDUKTIV XULOSA ChIQARIShI. Ehtimoliy xulosa chiqarish turli xil shakllarda, shu jumladan, induktiv xulosa chiqarish shaklida amalga oshishi mumkin. Ularning barchasiga xos xususiyat – xulosaning asoslardan mantiqan zaruriy ravishda kelib chiqmasligi hamda faqat ma’lum bir darajada tasdiqlanishidir. Asoslarning xulosani tasdiqlash darajasi mantiqiy extimollik, deb nom olgan.
Bilish, qaysi sohada amalga oshishidan qat’iy nazar-sog’lom aql darajasidami yoki ilmiy bilishdami – doimo predmet va hodisalarning hissiy idrok etiladigan xossa va munosabatlarini o’rganishidan boshlanadi. Uni falsafada, mantiqda empirik bilish bosqichi deb atashadi. Bu bosqichda sub’ekt turli xil tabiiy jarayonlar, ijtimoiy hodisalarda o’xshash sharoitlarda ma’lum bir xususiyatlarning takrorlanishini kuzatadi. Bu ana shu turg’un holda takrorlanib turuvchi xossaning ayrim predmetning individual xossasi emas, balki ma’lum bir sinfga mansub predmetlarning umumiy xossasi bo’lsa kerak, degan fikrga kelishga asos bo’ladi. Masalan, qaysi davlatda demokratiya printsiplariga yaxshi amal qilinsa o’sha davlat aholisining ijtimoiy turmush darajasi yuqoriligini kuzatish mumkin. Shu asosda demokratiyaning printsiplari, shartlari yaxshi amal qiladigan har qanday davlatda aholining turmush darajasi yuqori bo’ladi, degan xulosaga kelish mumkin.
Mana shunday juz’iy bilimdan umumiy bilimga mantiqan o’tish induktsiya shaklida sodir bo’ladi (lotincha inductio-yagona asosga keltirish).
Induktiv xulosa chiqarish empirik umumlashtirish shaklida sodir bo’lib, unda birorta belgining ma’lum bir sinfga mansub predmetlarda takrorlanishini kuzatish asosida, shu belgining mazkur sinfga tegishli barcha perdmetlarga xosligi xaqida xulosa chiqariladi.
Induktsiya asosida chiqarilgan xulosalar ilmiy bilishda o’rnatilgan turli empirik qonuniyatlar, yaratilgan umumlashmalar tarzida o’z aksini topadi, predmet va hodisalar haqidagi bilimlarimizni kengaytirishiga olib keladi.
Masalan:
Zardusht Qadimgi Xorazmda tug’ilgan
Budda Hindistonda tug’ilgan
Muso Misrda tug’ilgan
Iso (Iisus Xristos) Quddusga yaqin Viflemda tug’ilgan
Muhammad (SAV) Makkada tug’ilgan
Ular buyuk dinlarning asoschilaridir
Demak, buyuk dinlarning asoschilari Sharqdan chiqqanlar.
Yoki:
Kitoblar – ma’naviy boylik
Kitoblar - aqliy mexnat natijalari
Demak, aqliy mexnat natijalarining ba’zilari ma’naviy boylikdir.