Марказий банк Аппарати (Бош нозир)

621-САВОЛ: Хизмат сафари харажатлари учун олинган бўнак пуллари бўйича ҳисобот топшириш қайси тартибда амалга оширилади?
ЖАВОБ: Ҳисобдоpлик асосида пул олган ҳар бир ходим ўзи олган бўнакни қандай сарфлагани тўғрисида бўнак ҳисоботи топшириши, унга хўжалик харажатлари бўйича тасдиқловчи ҳужжатларни илова қилиши шарт. Ҳисобот сафардан қайтилганидан сўнг узоғи билан 3 кун ичида топширилиши зарур.
Ҳисобдоpлик асосида беpилган маблағлаpнинг сарфланмаган қолдиқлари хизмат сафаридан қайтилганидан кейин банк кассасига топширилиши лозим. Агар топшириқ бекор қилинса, уни бажариш учун ҳисобдорлик асосида берилган бўнак суммаси дарҳол қайтарилиши керак. (АВ №1834, 11.07.2008й)
622-САВОЛ: Баланс бўлмаганда ёки ҳисобда тартибга солинмаган тафовутлар чиққанда нима қилиниши лозим?
ЖАВОБ: Банк раҳбарлари баланс бўлмаган, ҳисобда тартибга солинмаган тафовутлар чиққанда ва бир кун давомида мижозларга хизмат кўрсатилиши таъминланмаган ҳолларда бу камчиликларни бартараф этиш учун зарур барча чора-тадбирларни кўриши лозим.
Банк филиаллари раҳбарлари ва бош бухгалтерлари баланс чиқмаганлиги ҳақида белгиланган муддатда Бош банкка хабар қилмасалар, уларга нисбатан эгаллаб турган лавозимларидан озод қилишгача бўлган чоралар кўрилади. (АВ №1834, 11.07.2008й)
623-САВОЛ: Хато бухгалтерия амалиётлари қандай бартараф этилади?
ЖАВОБ: Банк иш куни якунланиб, баланс ҳисоботи тузилиб Ўзбекистон Республикаси Марказий банкига жўнатилганидан сўнг, хато ёзувлар аниқланган ҳолларда, ушбу хато ёзувлар киритилган ҳисобварақларга эртаси банк иш куни тескари бухгалтерия ёзувлари киритиш (сторно бериш) йўли билан, тузатиш мемориал ордерлари асосида тўғриланиши лозим. Бундай ҳолларда ҳисобварақлардан суммалар мижозларнинг розилигисиз ҳисобдан чиқарилади. Бу ҳақда банк билан мижоз ўртасида тузилган шартномада кўрсатиб ўтилган бўлиши шарт. (АВ №1834, 11.07.2008й)
624-САВОЛ: Банк амалиёти кунлик ҳужжатлар йиғмажилдига қайси ҳужжатлар тикилади?
ЖАВОБ: Банк мижозлари тўлов ҳужжатларининг ҳамда қисман амалга оширилган тўловларда, шунингдек банк мижозлар билан шартномада белгиланган ҳисоб-китоблар бўйича амалга оширилган тўловлар учун қўлланилган мемориал ордерларнинг биринчи нусхаси, Банк ҳисобварақларига масофадан хизмат кўрсатиш тизими бўйича амалга оширилган тўлов ҳужжатларининг рўйхати, банклараро ва филиаллараро тўловлар бўйича банк ҳисобварақларининг кредитланишига асос бўлган электрон тўлов ҳужжатларининг рўйхати, банкнинг ички ҳисобварақлари бўйича амалга оширилган операциялари учун асос бўлган мемориал ордерлар рўйхати, кўзда тутилмаган ҳолатлар ҳисобварақлари бўйича амалга оширилган операциялар учун асос бўлган мемориал ордерларнинг масъул ижрочилар бўйича тузилган рўйхати, кунлик баланс ҳисоботи ва ҳисобварақлар бўйича айланма ва қолдиқ суммалар, кунлик бухгалтерия журнали.
Ҳужжатлар рўйхати кунлик бухгалтерия журналининг тегишли қисмидан дастурий йўл билан олинади. (АВ №1834, 11.07.2008й)