Маълумот инфратузилмани ривожлантириш

Юқоридагиларни инобатга олган ҳолда туризм соҳасини жадал ривожлантириш мақсадида қуйидагилар таклиф қилинади.
2022-йилда амалга ошириладиган ишлар.
Биринчидан, Аҳолини иш билан таъминлаш ва даромадларини ошириш мақсадида, туманларнинг салоҳиятидан келиб чиқиб, Шаҳрисабз туманининг “Сувтушар”, “Кўл”, “Ғилон” қишлоқлари, Китоб туманининг “Катлос”, “Башир”, “Қайнар” қишлоқлари, Яккабоғ туманининг “Татар” қишлоғи, Чироқчи тумани “Тарағай” қишлоқларида туризм қишлоқлари ташкил қилиниб, 160 та оилавий меҳмон уйлари фаолияти йўлга қўйилади ва бу орқали 300 га яқин янги иш ўринлари яратилади.
Иккинчидан, янги туристик йўналишларни жорий этиш мақсадида Қамаши туманидаги “Майданак” обсерваторияси ва “Лангар ота” масжиди ҳудудларида замонавий илмий-туристик маскан ташкил этиш орқали “Майданак” туристик-рекреацион зонаси ташкил этилади.
Учинчидан, хорижий ва маҳаллий сайёҳлар оқимини кўпайтириш мақсадида 2022-йил 4 та йирик ҳалқаро тадбирлар ташкил этилади. Жумладан: Май ойида Чироқчи тумани Тарағай қишлоғида “Тарағай баҳори” фестивали, Июнь ойида Қарши шаҳрида U23. Футбол бўйича ёшлар ўртасида Осиё чемпионати, Август ойида Китоб туманида “Халқаро геотуризм” форуми, Сентябрь ойида Қарши туманида “Абу Муин Насафий” Марказий Осиё уломолари илмий анжумани.
Тўртинчидан, сайёҳларга қулайлик яратиш мақсадида ҳудуддаги мавжуд туристик намойиш объектлари ва уларнинг жойлашув манзилига ҳақидаги маълумот тақдим этувчи Kashkadarya Travel Guide мобил иловаси яратилади. kashkadaryatravel.uz сайти такомиллаштирилади.
Бешинчидан, Вилоятнинг туристик салоҳиятини хорижий давлатларда намойиш этиш мақсадида Индонезия, Малайзия, Туркия, Миср каби давлатларда “Қашқадарё зиёрат туризми кунлари” ташкил этилади.
Олтинчидан, Қарши шаҳридаги “Насаф” кўчаси ва Шаҳрисабз шаҳридаги “Тепарлик” кўчаларида велосипед ва пиёда юриш йўлаклари, ҳунармандчилик маҳсулотлари савдоси, маданий-кўнгилочар дастурлар, савдо, овқатланиш ҳамда санитария-гигиена шохобчалари, банкоматлар, туризм ахборот маркази ва бошқа хизматлар кўрсатиш нуқталари жойлашган “Гастрономик кўча” ташкил этилади.