Маълумот-ахборот ҳужжатларини тайёрлаш ва ёзиш 01 02 03 Режа

БАЁННОМАДАН КЎЧИРМА

Зарурият туфайли мажлис давомида қабул қилинган қарорлардан кўчирмалар расмийлаштирилади. Буйруқдан кўчирмада бўлганидек, баённомадан кўчирма ҳам имзо билан тасдиқланади.
Баённомадан кўчирма қуйидаги асосий қисмлардан иборат:
Ташкилот номи.
Ҳужжат номи (баённомадан кўчирма).
Сана (мажлис санаси).
Шартли рақам.
Баённома тузилган жой.
Матн:
а) КУН ТАРТИБИ;
б) ЭШИТИЛДИ;
в) ҚАРОР ҚИЛИНДИ.
Имзолар.
Нусха тасдиқланганлиги ҳақида белги (муҳр билан).

БИЛДИРИШНОМА, БИЛДИРИШ

Муайян муассаса (таркибий қисм) раҳбарига хизмат фаолияти билан алоқадор муҳим масалалар юзасидан ёки юқори идора, мансабдор шахсга бирон-бир воқеа ва ҳодиса ҳақида хабардор қилиш зарурати туғулганда тақдим этиладиган муфассал ёзма ахборот. Унда, одатда, баён қилинаётган масалалар бўйича тузувчи (ёзувчи)нинг таклифлари акс этади.
Кимга йўлланганига қараб билдиришнома ички ва ташқи турларга ажралади.
Ички билдиришнома раҳбар шахс ёки бўлим мудири номига ёзилади. У тоза қоғоз варағига қўлда ёки компьютерда ёзилиши мумкин. Бундай билдиришномалар муаллиф томонидан имзоланади. Ташқи билдиришнома яъни раҳбар томонидан юқори идорага ёки мансабдор шахсга ёзиладиган билдиришнома, одатда, хос иш қоғозига икки нусхада ёзилади. Ҳужжатнинг иккинчи нусхаси муассасанинг ўзида қолдирилади. Бундай билдиришнома раҳбар томонидан имзоланади.
Билдиришнома ташаббус, ахборот ва ҳисобот хусусиятига эга. Бу хусусиятлар ҳужжат матни сарлавҳасидаёқ ўз аксини топади. Ташаббус билдиришномаси матнида тегишли масала юзасидан умумий ёки аниқ таклифлар илгари сурилиб, раҳбарни уларни ҳал қилишга ундайди (масалан, «Тошкент труба заводи» ҚКда мукофотлаш низомининг бузилганлиги ҳақида).
Ахборот билдиришномаси, одатда, раҳбарга маълум муайян жараённинг умумий ҳолати тўғрисида хабар беради. Масалан, Чиноз тумани Навоий номидаги фермер хўжалигида чигит экишнинг бориши (2012 йил 10 апрелдаги ҳолати) ҳақида.