Maktabgacha pedagogika

Fanning o‘quv rejadagi boshqa fanlar bilan o‘zaro bog‘liqligi va uslubiy jihatdan ketma-ketligi

Maktabgacha pedagogika fani umumkasbiy fanlar qatoriga kirib, 3-4 va 5- semestrlarda o‘qitiladi. Maktabgacha pedagogika fani falsafa, ijtimoiy-siyosiy fanlar, umumiy pedagogika, pedagogika tarixi, psixologiya va maxsus pedagogik fanlarga bog‘liq ravishda rivojlanib boradi. Ijtimoiy va oila pedagogikasi fanlaridan yetarli bilim va ko‘nikmalarga ega bo‘lishi talab etiladi.

Fanning maktabgacha ta’lim sohasidagi o‘rni

Maktabgacha ta’lim muassasalarida ta’lim-tarbiyani pedagog-tarbiyachi amalga oshiradi. U pedagogik jarayonda markaziy o‘rinni egallaydi. Shuning uchun tarbiyachi o‘z soxasini chuqur bilishi, xar xil metodik vositalarni yaxshi egallagan, puxta pedagogik psixologik tayyorgarlikka ega bo‘lishi kerak. Shu bilan bir qatorda mutaxassislik bo‘yicha fanlarni jumladan «Ta’lim to‘g‘risida»gi Qonun, Kadrlar tayyorlash milliy Dasturini, maktabgacha tarbiya pedagogikasi, «Bolajon tayanch dasturi»ni, Davlat ta’lim standartlarini, bolalarni maktabga tayyorlash metodikasi fani va boshqalarni puxta egallagan bo‘lishi lozimdir. Maktabgacha tarbiya yoshidagi bolalar asosan maktab ta’limiga maktabgacha ta’lim muassasalarida va oilada tayyorlanadi. Ayniqsa bolani oilada va maktabgacha ta’lim muassasalarida maktab ta’limiga tayyorlashda «Maktabgacha pedagogika» fanining o‘rni juda kattadir. Maktabgacha pedagogika fani bo‘lajak tarbiyachilarni amaliy faoliyatga tayyorlash bilan birga ularda yuksak kasbiy faoliyat malakalarini shakllantirishga xizmat qiladi. Ushbu fan asosiy umumkasbiy fan bo‘lganligi sababli Respublikadagi MTMlarga yuksak salohiyatga ega ega bo‘lgan mutaxassislarni yetkazib beradi.