Магистрлик иши

Xulosa . . . . . . . . . . . . . . . . . . . . . . . . . . . . . . . . . . . . . . . . . . . . . . .‎ . . . . . . . . . . . 71
Ilovalar.................................................................................................................. 74
Foydalanilgan adabiyotlar ro’yxati................................................................... 85
Kirish.
Mavzuning dolzarbligi. Xorazm vohasi Markaziy Osiyo sivilizatsiyasi shakllanishi va rivojlanishida alohida o’rin egallaydi. Prezident Islom Karimov ta’kidlab o’tganidek, “O’zbek davlatchiligining tamal toshlari bundan 2700 yil muqaddam aynan Xorazm vohasida qo’yilgan... Xorazm tarixi o’zbek davlatchiligining asosi, uning qudrati va qadimiyligining tasdig’idir”¹. SHu sababli ham Xorazm vohasining, xususan Xiva xonligining milliy davlatchiligimiz tarixida tutgan o’rnini o’rganish dolzarb mavzu sifatida katta ahamiyatga ega.
Tarix fanining hozirgi taraqqiyot bosqichida, tariximizni, milliy davlatchiligimiz tarixini o’rganish davlat siyosati darajasiga ko’tarilgan bugungi kunda O’zbekiston tarixini jahon sivilizatsiyasining muhim tarkibiy qismi sifatida o’rganish dolzarb vazifa sifatida kun tartibiga qo’yilmoqda². SHu jihatdan olganda o’zbek davlatchiligi tarixida o’ziga xos inqirozli davr sifatida qaraladigan so’nggi o’rta asrlar davri tarixini, davlatchilik va boshqaruv an’analarini, saroy hayotini, saroy mansabdorlarining markaziy va mahalliy boshqaruvni, tashqi aloqalarni, elchilik munosabatlarini amalga oshirishdagi o’rni masalasini chuqurroq o’rganish vatanimiz tarixshunosligi oldidagi muhim vazifalardan biridir.
Mavzuning dolzarbligi mavjud ma’lumotlarni yangi kontseptual-uslubiy asosda tizimlashtirish va umumlashtirish, o’rganilayotgan muammoga tegishli ilmiy qarashlar va kontseptsiyalarni qiyosiy tahlil etish, ma’lumotlarni ilmiy doiralarga kiritish uchun interpretatsiya qilish zaruriyati bilan ham belgilanadi.
Tadqiqotning maqsadi. Xiva xonligida saroy qabul marosimlariga xos an’analar va o’ziga xosliklarni yoritish, bu masalaning davlatchilik rivojida tutgan o’rnini ilmiy tadqiq etish va umumlashtirish magistrlik dissertatsiyasining asosiy maqsadi hisoblanadi.