М. М. Мусаев компьютер тизимлари ва тармоқлари

Симсиз глобал тармоқлар мобил иловаларнинг, улардан мамлакат ёки ҳатто континент масштабида фойдаланишини таъминлайди. Иқтисодий мулоҳазаларга таянган ҳолда, телекоммуникация компаниялари кўпинча фойдаланувчилар учун узоқ масофадан уланишни таъминловчи симсиз глобал тармоқнинг нисбатан қиммат инфратузилмасини яратадилар. Бундай ечимнинг ҳаражати барча фойдаланувчилар ўртасида тақсимланади, натижада, абонент тўлови унчалик юқори бўлмайди.
Симсиз тармоқларнинг ташкил этилиши. Симсиз тармоқларда симли тармоқда ишлатиладиган компонентлар ишлатилади, фақат ахборот ҳаво муҳити орқали узатишга яроқли кўринишга ўзгартирилиши лозим. Симсиз тармоқларда ишлатиладиган компонентлар қаторига компьютер қурилмалари, таянч станциялар ва симсиз инфратузилма киради.
Компьютер қурилмалари. Компьютер қурилмаларининг (баъзида уларни «мижозлар» деб аташади) кўпгина хиллари симсиз тармоқ билан ишлай олади. Баъзи компьютер қурилмалари фойдаланувчилар учун атайин қурилган бўлса, бошқалари охирги тизим ҳисобланади.
Мобил иловалар ишини таъминлаш ва одамларга ўзлари билан узоқ вақт мобайнида олиб юришларида қулайлик туғдириш учун компьютер қурилмалари ихчам бўлиши лозим. Одатда, улар катта бўлмаган экранга, кам сонли тугмачаларга ва ўлчамлари кичик батареяга эга. Симсиз тармоқларнинг компьютер қурилмалари серверлар, маълумотлар базаси ва Web-узеллар каби охирги тизимларни ҳам ўз ичига олади.
Фойдаланувчилар мавжуд компьютер қурилмаларини симсиз тармоқда ишлатиш учун (масалан, симсиз тармоқ интерфейси платасини ноутбукка ўрнатиш орқали) мослаштиришлари мумкин. Тармоқ интерфейси платаси ёки тармоқ адаптери (network interface card) компьютер қурилмаси ва симсиз тармоқ инфратузилмаси орасида интерфейсни таъминлайди. Бу плата компьютер қурилмаси ичига ўрнатилади, баъзида ташқи тармоқ адаптери ҳам ишлатилади. Бундай адаптерлар, ишга туширилиши билан компьютер қурилмаси ташқарисида қолади.
Компьютер қурилмалари Windows-XP, Linux ёки MAC OS каби операцион тизимга ҳам эга бўлиб, бу операцион тизим симсиз тармоқ иловаларини амалга ошириш учун зарур бўлган дастурий таъминотни ишга туширади.