Loyiha toshkent davlat yuridik universiteti

 

385 

 

Aniqladi:  

Da’vogar  (F.I.O.)  javobgar  (F.I.O.)ga  nisbatan  bola  bilan  uchrashuv  vaqtini 

belgilash haqidagi da’vo ariza bilan sudga murojaat qilgan. 

Sud  majlisida  da’vogar  (F.I.O.)  da’vo  talablarini  to‘liq  quvvatlab,  javobgar 

(F.I.O.)  bilan  2010-yil  23-  oktabrda  qonuniy  nikohdan  o‘tib  turmush  qurganligini, 

birgalikdagi turmushlaridan bir nafar – 2011-yil 11- sentabrda tug‘ilgan (F.I.O.) ismli 

farzandi  borligini,  javobgar  bilan  o‘zaro  munosabatlari  turmushlari  boshida  yaxshi 

bo‘lganligini,  keyinchalik  javobgar  bilan  o‘zaro  kelishmovchiliklar,  javobgarning 

oilada  sababsiz  ravishda  janjal  qilishlari,  javobgar  ota-onasining  ularning  oilasiga 

aralashishlari  natijasida  o‘rtalaridagi  er-xotinlik  munosabatlari  yomonlashib 

ketganligini,  javobgar  bilan  2011-yil  mart  oyidan  buyon  birga  yashamasligini,  o‘sha 

paytdan  buyon  o‘rtalarida  umumiy  ro‘zg‘or  yuritilmasligini,  javobgar  bilan 

o‘rtalaridagi  qonuniy  nikohlari  bekor  qilinganligini,  hozirgi  kunda  farzandi 

javobgarning tarbiyasida ekanligini, farzandi uchun qonunda belgilangan miqdordagi 

nafaqani o‘z vaqtida to‘lab kelayotganligini, hozirda javobgar unga farzandini ixtiyoriy 

ravishda ko‘rsatmayotganligini, shu sababli farzandi bilan uchrashib, uning tarbiyasida 

ishtirok  etishni,  uni  moddiy  jihatdan  ta’minlashni  xohlayotganligini,  hozirgi  kunda 

farzandini  ko‘rmaganligini,  amaldagi  qonunchiliklarga  ko‘ra  ota  sifatida  o‘z 

farzandining  tarbiyasida  ishtirok  etishi  shartligini  bayon  qilib,  da’vo  talablarini 

qanoatlantirishni  hamda  farzandi  bilan  har  hafta  shanba  va  yakshanba  kunlari 

uchrashuv vaqtini belgilab berishni so‘radi.  

Sud  majlisida  javobgar  (F.I.O.)  da’vogarning  da’vo  talablarni  tan  olmasdan, 

da’vogar  bilan  2010-yil  oktabr  oyida  qonuniy  nikohdan  o‘tib  turmush  qurganligini, 

birgalikdagi  turmushlaridan  bir  nafar  (F.I.O.)  ismli  voyaga  yetmagan  farzandi 

borligini,  da’vogar  bilan  o‘zaro  kelishmovchiliklar  sababli  o‘rtalaridagi  qonuniy 

nikohlari  bekor  qilinganligini,  da’vogar  bilan  2011-yil  mart  oyidan  buyon  birga 

yashamasligini, farzandi hozirgi kunda  o‘zining tarbiyasida ekanligini, farzandi bilan 

ota-onasining  uyida  yashab  kelayotganligini,  farzandi  unga  o‘rganib  qolganligini, 

farzandini da’vogarga har haftada ikki marta bera olmasligini, chunki bu farzandining 

ruhiy  holatiga  salbiy  ta’sir  qilishi  mumkinligini,  da’vogar  biror  marta  farzandini 

ko‘rish  uchun  kelmaganligini  bayon  qilib,  suddan  da’vogarning  da’vo  arizasini  rad 

qilishni so‘radi.  

Mustaqil  talablar  bilan  arz  qilmaydigan  3-shaxs  –  Olmazor  tuman 

XTMFMTTEB  bolalikni  himoyalash  bo‘limining  vakili  (F.I.O.)  (sudning 

so‘rovnomasiga  asosan)  taraflarning  yashash  sharoitlarini  tekshirilganligi  haqida 

dalolatnoma  va  ishni  o‘zining  ishtirokisiz  ko‘rib  chiqish  haqida  sudga  ariza  taqdim 

qilganligi sababli, sud ishni FPKning 174-moddasiga ko‘ra mustaqil talablar bilan arz 

qilmaydigan  3-shaxs  –  Olmazor  tuman  XTB  bolalikni  himoyalash  bo‘limining 

vakilining ishtirokisiz ko‘rib chiqishni lozim topadi.  

---

FUQAROLIK ISHLARI BO‘YICHA PROTSESSUAL HUJJATLARLARDAN NAMUNALAR 

 

386 

 

Sud  taraflarning  ko‘rgazmalarini  hamda  Toshkent  shahar  Olmazor  tumani 

prokurori  yordamchisi  (F.I.O.)ning  fikrini  tinglab,  ish  materiallari  bilan  tanishib, 

quyidagi xulosaga keladi: 

Aniqlanishicha,  da’vogar  (F.I.O.)  va  javobgar  (F.I.O.)  2010-yil  23-oktabr  kuni 

Toshkent  shahar  Olmazor  tumani  FHDYo  bo‘limi  tomonidan  qonuniy  nikohdan 

o‘tganlar va bu haqda nikoh tuzish dalolatnomalarini qayd qilish daftarida 1248-sonli 

yozuv qayd qilingan. 

O‘rtalaridagi turmushdan bir nafar – 2011-yil 11-sentabrda tug‘ilgan (F.I.O.) ismli 

farzandlari bor. Taraflar o‘zaro kelishmovchiliklar sababli 2011-yil mart oyidan buyon 

birga yashamaydilar.  

Taraflar  o‘rtalaridagi  qonuniy  nikoh  Fuqarolik  ishlari  bo‘yicha  Shayxontohur 

tumanlararo  sudining  2011-  yil  12-  avgust  kunidagi  hal  qiluv  qaroriga  ko‘ra  bekor 

qilingan.  

Hozirda  javobgar  da’vogarni  voyaga  yetmagan  farzandi  bilan  uchrashishga 

qarshilik  qilib  kelayotganligi  sababli,  da’vogar  bu  borada  sudga  murojaat  etishga 

majbur bo‘lgan. 

O‘zbekiston Respublikasi Oila kodeksi 66-moddasining 2-qismiga ko‘ra, ota va 

ona alohida yashagan holda, bola ularning har biri bilan ko‘rishish huquqiga ega. 

O‘zbekiston  Respublikasi  Oila  kodeksining  71-moddasiga  ko‘ra,  ota-ona  o‘z 

bolalariga nisbatan teng huquq va majburiyatlarga egadirlar. 

O‘zbekiston  Respublikasi  Oila  kodeksi  73-moddasining  1-,  2-qismlariga  ko‘ra, 

ota-ona  o‘z  bolalarini  tarbiyalash  huquqiga  ega  va  tarbiyalashi  shart.  Ota-ona  o‘z 

bolalarining  tarbiyasi  va  kamoloti uchun  javobgardir.  Ular  o‘z bolalarining sog‘lig‘i, 

jismoniy, ruhiy, ma’naviy va axloqiy kamoloti haqida g‘amxo‘rlik qilishlari shart. 

O‘zbekiston  Respublikasi  Oila  kodeksi  76-moddasining  1-,  2-qismlariga  ko‘ra, 

bola  bilan  alohida  yashayotgan  ota(ona)  bola  bilan  ko‘rishish,  uning  tarbiyasida 

ishtirok  etish  va  ta’lim  olishi  masalasini  hal  etishda  qatnashish  huquqiga  ega.  Bola 

bilan birga yashayotgan ota (ona) bolaning ona (ota)si bilan ko‘rishishiga, agar bunday 

ko‘rishish bolaning jismoniy va ruhiy sog‘lig‘iga, axloqiy kamolotiga zarar keltirmasa, 

qarshilik  qilmasligi  kerak.  Sud  yuqoridagi  holatlarga  hamda  taraflarning  farzandiga 

nisbatan  teng  huquq  va  majburiyatga  ega  bo‘lib,  farzandning  tarbiyasi  va  kamoloti 

uchun  javobgar  ekanliklariga,  da’vogar  (F.I.O.)ning  farzandi  bilan  uchrashishi 

bolaning  jismoniy  va  ruhiy  sog‘lig‘iga,  axloqiy  kamolotiga  zarar  keltirishi  mumkin 

bo‘lgan  holatlar  aniqlanmaganligiga,  bolaning  bugungi  kunda  boshqa  oilada  yashab 

kelayotganligiga, voyaga yetmagan farzandning yoshiga huquqiy baho bergan holda, 

da’vogarning  da’vo  talabini  qisman  qanoatlantirishni  hamda  uning  farzandi  bilan 

uchrashish  vaqtini  har  haftaning  shanba  kuni  soat  10:00  dan  13:00gacha  vaziyat 

o‘zgargunga qadar onasi (F.I.O.) ishtirokida belgilashni lozim deb topadi. Garchi, sud 

majlisida  da’vogar  (F.I.O.)  farzandi  bilan  haftaning  shanba  va  yakshanba  kunlari 

---

FUQAROLIK ISHLARI BO‘YICHA PROTSESSUAL HUJJATLARLARDAN NAMUNALAR 

 

387 

 

uchrashuv  vaqtini  belgilashni  so‘ragan  bo‘lsa-da,  sud  voyaga  yetmagan  (F.I.O.)ning 

yoshini, onasiga bog‘langani va onasi bilan yashab kelayotgani holatlarini, shuningdek, 

otasini  ko‘rmagani  va  tanimasligini  inobatga  olib,  bola  bilan  bir  haftada  ikki  kun 

uchrashuv  vaqtini  belgilash  maqsadga  muvofiq  emasligini  inobatga  oladi. 

Yuqoridagilarni  inobatga  olib,  O‘zbekiston  Respublikasi  Oila  kodeksining  66-,  71-, 

73-, 76-moddalari hamda FPKning 203–206-moddalariga asosan, sud