Loyiha matni 49901-(61999)

82-modda. Fermer xoʻjaligining mol-mulkini meros qilib qoldirish
Fermer xoʻjaligining mol-mulki qonunchilikka muvofiq meros qilib qoldiriladi. Xoʻjalikda
faoliyatni davom ettirayotgan merosxoʻrlar merosga boʻlgan huquq toʻgʻrisidagi guvohnoma berilganligi
uchun davlat boji toʻlashdan ozod etiladilar.
Fermer xoʻjaligi boshligʻi vafot etgan taqdirda, yer uchastkasini ijaraga olish huquqi
qonunchilikka muvofiq ijaraga olish shartnomasining amal qilish muddatiga meros boʻyicha oʻtadi.
Fermer xoʻjaligining boshligʻi vafot etgan taqdirda, ijaraga olish shartnomasini yangi muddatga
uzaytirish huquqiga uning merosxoʻri ega boʻladi.
83-modda. Fermer xoʻjaligining majburiyatlari boʻyicha javobgarlik
Fermer xoʻjaligi oʻz majburiyatlari boʻyicha, shu jumladan tuzilgan kontraktatsiya
shartnomalariga muvofiq davlat ehtiyojlari uchun qishloq xoʻjaligi mahsuloti nazarda tutilgan hajmlarda
yetkazib berilishini taʼminlash boʻyicha, shuningdek moddiy-texnika resurslari yetkazib berilganligi va
xizmatlar koʻrsatilganligi uchun oʻz vaqtida haq toʻlash boʻyicha qonunchilik hujjatlariga muvofiq
undiruv qaratilishi mumkin boʻlgan oʻz mol-mulki bilan javob beradi.
Fermer xoʻjaligining boshligʻi fermer xoʻjaligining mol-mulki yetarli boʻlmagan taqdirda fermer
xoʻjaligining majburiyatlari boʻyicha oʻziga qarashli mol-mulk bilan qonunchilikka muvofiq subsidiar
javobgar boʻladi.
Xodimning mehnat majburiyatlarini bajarishi munosabati bilan uning hayoti va sogʻligʻiga

---

project.gov.uz
06.06.2022
35
yetkazilgan zarar uchun javobgar qayta tashkil etilayotgan yoki tugatilayotgan fermer xoʻjaligida mablagʻ
boʻlmagan yoxud yetarli boʻlmagan taqdirda, undirilishi lozim boʻlgan summalar qonunchilikda nazarda
tutilgan tartibda davlat tomonidan toʻlanadi.
84-modda. Fermer xoʻjaligini tugatish asoslari
Fermer xoʻjaligi ushbu Kodeksning 22-bobida belgilangan tadbirkorlik subyektlari-yuridik
shaxslarni tugatish asoslaridan tashqari quyidagi hollarda tugatiladi:
fermer xoʻjaligini yuritish uchun yer uchastkasi berish boʻyicha ochiq tanlovda fermer xoʻjaligi
boshligʻi tomonidan koʻrsatib oʻtilgan mol-mulk, texnika va pul mablagʻlari ustav fondiga
kiritilmaganda;
yer uchastkasini ijaraga olish huquqidan ixtiyoriy voz kechilganida;
moddiy-texnika resurslari yetkazib beruvchilar, ish bajaruvchilar va xizmat koʻrsatuvchilar bilan
hisob-kitob muntazam ravishda amalga oshirilmaganida;
fermer xoʻjaligining boshligʻi vafot etib, xoʻjalik faoliyatini davom ettirishni xohlovchi
merosxoʻr boʻlmasa;
davlat va jamiyat ehtiyojlari uchun yoki yer toʻgʻrisidagi qonunchilikni buzganlik uchun, shu
jumladan fermer xoʻjaligi yer uchastkasidan belgilangan maqsadda foydalanmaganida, xususan
kontraktatsiya shartnomasida nazarda tutilmagan qishloq xoʻjaligi ekinlarini ekkanida yer uchastkasini
olib qoʻyish zarurati boʻlgan taqdirda, yer uchastkasini ijaraga olish shartnomasi belgilangan tartibda
bekor qilinsa, shuningdek Oʻzbekiston fermer, dehqon xoʻjaliklari va tomorqa yer egalari kengashiga
aʼzoligi tuman fermer, dehqon xoʻjaliklari va tomorqa yer egalari kengashlari rayosatining qaroriga
muvofiq tugatilishi munosabati bilan.
Fermer xoʻjaligi tasarrufidagi yer uchastkasiga boʻlgan huquq tugatilganda koʻchmas mulk
obyektlariga boʻlgan huquqlarni davlat roʻyxatidan oʻtkazuvchi organ bu haqda Koʻchmas mulk
obyektlariga boʻlgan huquqlarning davlat reyestriga tegishli yozuv kiritilgan kunning oʻzida davlat
xizmatlari markaziga elektron xabarnoma yuboradi.