Loyiha matni 49901-(61999)

project.gov.uz
06.06.2022
180
Mol-mulkni chet ellik investorlarga ijaraga berish ijaraga beruvchi tomonidan tegishli
shartnomalar asosida amalga oshiriladi.
Chet el investitsiyalari ishtirokidagi korxonalar xodimlarining mehnatga oid munosabatlari
Oʻzbekiston Respublikasining Mehnat kodeksi bilan tartibga solinadi.
Chet el investitsiyalari ishtirokidagi korxonalar xodimlarining pensiya taʼminoti qonunchilik
bilan tartibga solinadi.
11-§. Oʻzbekiston Respublikasidan tashqarida investitsiya faoliyatini amalga oshirish
361-modda. Yuridik va jismoniy shaxslarning Oʻzbekiston Respublikasidan tashqaridagi
investitsiya faoliyati
Oʻzbekiston Respublikasi rezidentlari boʻlgan jismoniy va yuridik shaxslar, shuningdek davlat
boshqaruvi organlari Oʻzbekiston Respublikasidan tashqarida investitsiya faoliyatini amalga oshirish
huquqiga ega.
Oʻzbekiston Respublikasining mol-mulkini chet davlatlar hududidagi yuridik shaxslarning ustav
fondlariga (ustav kapitallariga) kiritish mulkdorning yoki u vakolat bergan davlat boshqaruvi
organlarining roziligi bilan amalga oshiriladi.
Chet davlatlarning hududiga investitsiyalar yuborishni tartibga solish ushbu Kodeksga, hududida
investitsiya faoliyati amalga oshirilayotgan davlatning qonunchiligiga, shuningdek Oʻzbekiston
Respublikasining xalqaro shartnomalariga muvofiq amalga oshiriladi.
362-modda. Investitsiyalarni Oʻzbekiston Respublikasidan tashqariga yuborish chogʻidagi
investitsiya faoliyatining shakllari
Oʻzbekiston Respublikasi rezidentlari boʻlgan jismoniy va yuridik shaxslarning Oʻzbekiston
Respublikasidan tashqaridagi investitsiya faoliyati quyidagi shakllarda amalga oshirilishi mumkin:
Oʻzbekiston Respublikasi rezidentlari boʻlgan jismoniy va yuridik shaxslarning investitsiyalari
ishtirokidagi yuridik shaxslarni, shuningdek ularning shoʻba korxonalarini, filiallarini, vakolatxonalarini
va boshqa alohida boʻlinmalarini chet davlatning qonunchiligi talablariga rioya etgan holda tashkil etish;
mol-mulkni yoki mulkiy huquqlarni olish;
chet davlatlarning qonunchiligiga zid boʻlmagan hamda Oʻzbekiston Respublikasining xalqaro
shartnomalariga muvofiq boʻlgan boshqa har qanday shakllar.