Lichinka xordalilar kenja tipi. Assidiyalar sinfi. Salplar sinfi. Appendikulyariyalar sinfi

Bochkalilar-Doliolidae sinfi. Bu sinfga polimorf koloniya hosil qilish juda xarakterli bo‘lib, koloniyasining uzunligi 30-40 sm gacha yetadi . Koloniyalari dengizlarda erkin suzib yuradi.tansi bochkasimon bo‘lib, uzunligi 3sm gacha yetadi. Rivojlanishi juda murakkab bo‘lib, jinsiy va jinssiz gallanib ko‘payadi.
Appendikulyariyalar-Appendiculariae sinfiga xos xususiyatlar
Appendikulyariyalar gavdasining uzunligi 0,5-3 mm dan, ayrim turlari 1- 2 sm gacha borishi mumkin. Ular yakka-yakka holda dengizlarda erkin suzib yurib hayot kechiruvchi primitiv qobiqlardan hisoblanadi.Appendikulyariyalarning xordasi bir umrga saqlanadi. Ularning tuzilishi assidiyalar lichinkasining tuzilishiga o‘xshaydi, undan asosan, ipsimon nerv tortmasi va dumi borligi bilan farq qiladi. Dumi assidiya lichinkasi dumi singari, yonidan siqilgan bo‘lsa ham, lekin vertikal tekistlik bo‘ylab o‘rnashmay balki, gorizontal tekislik bo‘ylab o‘rnashgan bo‘ladi .
Appendikulyariyalarning haqiqiy qobig‘i bo‘lmaydi. Qobig‘i murakkab tarkibiga ega bo‘lgan dildiroq tiniq moddadan iborat. Bu modda hayvon tanasini o‘rab turadigan uychani hosil qiladi. Appendikulyariyalar uychasini tashlab chiqib oqib ketishi va 1-1,5 soat ichida yangi uycha hosil qilishi mumkin. Dumini harakatlanishi tufayli suv uychasining filtrlovchi apparatiga o‘tib, undan og‘iz teshigi va halqum devoridagi ikki juft jabra teshiklari orqali tashqariga chiqib ketadi. Jabra teshiklari devoridagi kapillyarlar orqali gaz almashinuv sodir bo‘ladi. Halqum devorida endostil bo‘ladi. Endostil suvdagi mayda organizmlar va organik qoldiqlarni filtrlashga yordam beradi. Jabraoldi bo‘shlig‘i va kloakasi bo‘lmaydi. Anal teshigi qorin tomonida joylashgan, nerv nayi ustida yorug‘lik sezadigan ko‘zchasi va muvozanat saqlash organi joylashgan.Appendikulyariyalar ham germafrodit bo‘lib, faqat jinsiy yo‘l bilan ko‘payadi. Lichinkasining og‘iz teshigi bo‘lmaydi. Lekin xordasi va nerv nayi rivojlangan. Appendikulyariyalar sinfining 60-100 ga yaqin turlari aniqlangan. Hamma okean va dengizlarda uchraydi. Asosan suvning yuza qismidagi planktonda hayot kechiradi. Appendikulyariyalar lichinkalik davrida ko‘payish qobiliyatiga ega bo‘lgan va evolyusiya jarayonida yetuklik davrini yo‘qotgan qobiqlilar bo‘lishi mumkin.