Ўлчаш воситаларини қиёслаш, калибровка қилиш усуллари

Ўлчаш воситаларига бўлган техник талаблар.
Агар бир турдаги ўлчаш воситаларига бўлган техник талаблар (техник шартлар) нинг давлат стандарти мавжуд бўлса ва текшириш воситаларини серияли ишлаб чиқарилиши таъминланган бўлса, бундай ўлчаш воситалари учун Текширишлар методикасининг Давлат стандарти ишлаб чиқилади. Серияли ишлаб чиқариладиган ёки партиялаб импорт қилинадиган ва текшириш воситалари билан таъминланган ўлчаш воситалари учун Ўзстандартнинг текшириш бўйича методик (услубий) кўрсатмаси ишлаб чиқилади
Давлат синови қабулига тақдим этилган янги ўлчаш воситалари учун текшириш бўйича метрология институтларининг услубий кўрсатмаси ишлаб чиқилади ва давлат метрология хизматлари кўрсатиш органлари ёки идораларида синовдан ўтказилгандан кейин текшириш бўйича Ўзстандартнинг услубий кўрсатмалари ёки давлат стандартларини ишлаб чиқиш учун асос бўлиб хизмат қилади.
Стандартлаштирилмаган, тор соҳага мўлжалланган, бир марта ишлаб чиқилган ўлчаш воситаларини идоравий текширувдан ўтказиш учун Ўзстандартнинг давлат стандартлари ва услубий кўрсатмалари бўлмаганда, ишлаб чиқарувчилар ушбу ўлчаш воситаларини текшириш бўйича услубий кўрсатма тузишлари лозим. Ушбу кўрсатма ишлаб чиқарувчи корхонанинг бош метрологи томонидан тасдиқланади.
Битта физик катталикни ўлчашга мўлжалланган ёки барча диапазонда ишлатилмайдиган комбинирлашган ва кўп диапазонли ўлчаш воситаларини даврий текшириш корхонанинг бош метрологи қарорига кўра фақат ишлатиладиган диапазонлардагина амалга оширилиши мумкин. Бундай ҳолларда ўлчаш воситасига қўлланиш соҳасини белгилаб берувчи ёзув осилади. Бундай ёзув паспорт ва текширув ҳақидаги гувоҳномага ҳам амалга оширилган бўлиши лозим.
Фақатгина, физик катталикларнинг ўзгаришини, уларни меъёрлаштирилмаган аниқлик билан сифат бўйича баҳолаш учун хизмат қилувчи ўлчаш воситалари, яъни индикаторлар, шунингдек ўқув мақсадларида қўлланиладиган ўлчаш воситалари текширувдан ўтказилмайди. Уларнинг созлигини назорат қилиш идора хизмати томонидан амалга оширилади. Бундай ўлчаш воситаларига кўринадиган қилиб, “И” (индикатор) ёки “У” (ўқув (учебный)) белгилари қўйилади.