Labora-toriya jumislari

Perikardial shawqımlar
Bul shawqımlar kesellik júrektiń epikard qabatı menen perikard qabatı ortasında bolsa esitiledi. (perikardit keselliginde). Kesellik nátiyjesinde bul jerde gaz yamasa suyıqlıq toplansa shalpıldaw yamasa pıshırlaw dawısları esitiliwi múmkin. Bul dawıslar búlkildew, kóbiktiń bıjıllaw hám qarsıldaw dawıslarına uqsas esitiledi. Egerde perikardta fibrin talshıqları shókse, súykelisiw dawısı esitiledi. Bul dawıs shıyqıldaw, ǵıshırlaw, qardıń ǵıshırlaw yamasa dawıslarına uqsas esitiledi.
Perikardial shawqımlar júrektiń sistolası yamasa diastolası menen tuwrı kelmewi, ayırım waqıtlarda turaqlı emesligi, eń jaqsı esitiletuǵın jeri joq ekenligi menen endokardial shawqımlardan ajıratıladı.
Perikardial shawqımlar kúshli esitiledi, ásirese júrektiń ushınan hám júrek jumısı menen baylanıslı boladı.Perikardit keselliginde aldın fibrin talshıqları shógip, keyin onda suyıqlıqlar toplanǵanlıǵı ushın, keselliktiń baslanıwında súykelisiw dawısı esitiledi. Aldın bul dawıs kúshli esitilip, keyin dawıstıń kúshi pàseye baslaydı. Bir neshe kún ótkennen bul dawıs joǵalıp, shapıldaw dawısı esitile baslaydı. Súykelisiw dawısı kóbinese júrektiń tiykarınan, jelke - kòkirek buwını sızıǵı astınan kúshli esitiledi. Sol sebepli súykelisiw dawısınıń shalpıldaw dawısına ótip, kúsheyip barıwı, haywan jaǵdayı jamanlasıp atırǵanınan derek beredi. Bul jaǵday kóbinese qaramallardıń travmatik perikardit keselliginde gúzetiledi.
Plevroperikardial shawqımlar.
Bul shawqımlar júrektiń perikard perdesi menen ókpeniń plevra perdesi ortasında fibrin talshıqları shókse yamasa asqınıw bolıp (plevrit), suyıqlıq toplansa, tırtıqlar ósse esitiledi. Bul jerde de shapıldaw hám súykelisiw dawısları turaqlı esitiledi hám ókpe jumısı menen baylanıslı boladı.
Perikardial hám plevroperikardial shawqımlardı bir- birinen parıqlaw ushın amion usılı qollanıladı. Onıń ushın vrachtıń járdemshisi eki qolı menen haywannıń eki tanawdı bekitib, dem alıwdı waqtınsha toqtatadı. Sol waqıtta vrach júrekti auskultaciya etedi. Egerde haywanda dem alıw toqtaǵannan keyin júrekten esitilip atırǵan shawqımlar da joǵalsa bul plevroperikardial shawqım ; dem alıw toqtaǵannan keyin de shawqım bolsa - bul perikardial shawqım esaplanadı.