Konsullik xizmatlari

21-modda.

Konsul har yili kamida bir marta o‘z konsullik okrugini aylanib chiqishi shart.

22-modda.

Konsullik mansabdor shaxslari hamda konsullik muassasalari xodimlarining xatti-harakatlari ustidan qilingan shikoyatlar bo‘ysunish tartibida ko‘rib chiqiladi.

IKKINChI BO‘LIM. KONSULLIK VAZIFALARI VA ULARNI BAJARISh TARTIBI

II bob. KONSULNING O‘ZBEKISTON RESPUBLIKASI YuRIDIK ShAXSLARI VA FUQAROLARIGA TAALLUQLI VAZIFALARI

23-modda.

Konsul O‘zbekiston Respublikasining yuridik shaxslari va fuqarolari konsulxona joylashgan davlatning qonun hujjatlariga ko‘ra va O‘zbekiston Respublikasi hamda konsulxona joylashgan davlat ishtirokchisi bo‘lgan xalqaro shartnomalarga, shuningdek xalqaro taomillarga ko‘ra ularga berilgan barcha huquqlardan foydalana olishlari uchun chora-tadbirlar ko‘rishi shart.

Konsul yozma arizalarni ham, og‘zaki arizalarni ham qabul qilishi shart.

24-modda.

Konsul O‘zbekiston Respublikasi yuridik shaxslari va fuqarolarining buzilgan huquqlari tiklanishi uchun chora-tadbirlar ko‘rishi shart.

25-modda.

Konsul uning konsullik okrugida doimiy yashayotgan hamda vaqtincha turgan O‘zbekiston Respublikasi fuqarolarining hisobini yuritadi.

26-modda.

Konsul O‘zbekiston Respublikasi vazirliklari, idoralari, korxonalari, muassasalari va tashkilotlarining konsullik okrugi doirasida turgan vakillariga o‘z xizmat vazifalarini bajarishlarida ko‘maklashadi.

27-modda.

Konsul uning konsullik okrugida vaqtincha turgan O‘zbekiston Respublikasi fuqarolarini konsulxona joylashgan davlatning qonunlari va boshqa normativ hujjatlaridan, shuningdek mahalliy urf-odatlardan xabardor qiladi.

Konsulning O‘zbekiston Respublikasi fuqarolarining chet elda bo‘lishlariga doir masalalar bo‘yicha farmoyishlari ular uchun majburiy kuchga egadir.

28-modda.

Konsul uning konsullik okrugida turgan O‘zbekiston Respublikasining fuqarolari uchun madaniy-ma’rifiy tadbirlar o‘tkazilishiga ko‘maklashadi.

29-modda.

Agar O‘zbekiston Respublikasining yuridik shaxslari va fuqarolari hozir bo‘lmasalar va ish yuritishni biror-bir shaxsga topshirmagan bo‘lsalar yoki boshqa sabablarga ko‘ra o‘z manfaatlarini himoya qilishga qodir bo‘lmasalar, konsulxona joylashgan davlat muassasalarida konsul ularning nomidan ishonchnomasiz vakillik qilish huquqiga egadir. Ushbu vakillik ular o‘z vakillarini tayinlagunga qadar yoki o‘z huquq va manfaatlarini himoya qilishni o‘z zimmalariga olgunga qadar davom etadi.